દિલ્હીમાં સગીર બાળકીની હત્યા- દુષ્કર્મ : પીડિત પરિવારને મળ્યા રાહુલ ગાંધી : કહ્યું - ન્યાયના રસ્તે તેમની સાથે રહેશે

પીડિત પરિવાર સાથે સ્થાનિક લોકો સ્મશાનની બહાર ધરણા પર બેઠા

નવી દિલ્હી : દિલ્હીના કેન્ટ વિસ્તારમાં ઓલ્ડ નંગલ સ્મશાનગૃહમાં કથિત બળાત્કાર અને ત્યારબાદ સગીર બાળકીની હત્યાનો કેસ હવે વેગ પકડી રહ્યો છે. આ ઘટનાના વિરોધમાં પીડિત પરિવાર સાથે સ્થાનિક લોકો સ્મશાનની બહાર ધરણા પર બેઠા છે. દરમિયાન, કોંગ્રેસના પૂર્વ અધ્યક્ષ રાહુલ ગાંધી અહીં પહોંચ્યા અને પીડિત પરિવારને મળ્યા. વિરોધ સ્થળ પર વધારે ભીડ હોવાને કારણે રાહુલ ગાંધી વાહનની અંદર બેસીને પીડિતના માતા -પિતા સાથે વાત કરી હતી .

પીડિત પરિવારને મળ્યા બાદ રાહુલ ગાંધીએ ટ્વીટ કર્યું હતું કે, માતા -પિતાના આંસુ માત્ર એક જ વાત કહી રહ્યા છે - તેમની પુત્રી, દેશની પુત્રી ન્યાયને પાત્ર છે. અને હું ન્યાયના આ માર્ગ પર તેમની સાથે છું. મંગળવારે ટ્વીટ કરીને આ ઘટના પર દુ:ખ વ્યક્ત કરતા રાહુલ ગાંધીએ કહ્યું કે દલિતની પુત્રી પણ દેશની પુત્રી છે. દિલ્હી પોલીસે પણ તેની કાર્યવાહી તેજ કરી છે, આ કેસમાં પુજારી સહિત ચાર લોકોની ધરપકડ કરવામાં આવી છે.