બ્રિટનમાં મોંઘવારી સામે જાહેર ઝુંબેશ તેજ બની : એક જૂથે યુકેમાં 50 રેલીઓ યોજવાની જાહેરાત કરી

વિરોધ પ્રદર્શન આવતા સપ્તાહથી શરૂ થશે : અન્ય જૂથે કુદરતી ગેસના વધેલા ભાવની ચૂકવણી ન કરવાની ઝુંબેશ શરૂ કરી

નવી દિલ્લી તા.14 : બ્રિટનમાં મોંઘવારી સામે જાહેર ઝુંબેશ તેજ બની રહી છે. અત્યાર સુધી આ પ્રકારનું અભિયાન સોશિયલ મીડિયા પર ચાલતું હતું. પરંતુ હવે એક જૂથે સમગ્ર યુકેમાં 50 રેલીઓ યોજવાની જાહેરાત કરી છે. આ વિરોધ પ્રદર્શન આવતા સપ્તાહથી શરૂ થશે. પહેલા, અન્ય જૂથે કુદરતી ગેસના વધેલા ભાવની ચૂકવણી ન કરવાની ઝુંબેશ શરૂ કરી છે - કાન્ટ પે, વોન્ટ પે (અમારી પાસે વધેલી કિંમત ચૂકવવાની ક્ષમતા નથી, અમે ચૂકવણી કરીશું નહીં). હવે રેલીઓ આયોજિત કરવા માટે એક નવું જૂથ બનાવવામાં આવ્યું છે, જેનું નામ ઈનફ ઈઝ ઈનફ છે.

ઇનફ ઇઝ ઇનફ ઝુંબેશમાં ઘણા ટ્રેડ યુનિયનો, સમુદાય સંગઠનો, ભાડૂતોની સંસ્થાઓ અને રાજકારણીઓનો સમાવેશ થાય છે. તેના આયોજકોએ સોશિયલ મીડિયા પર એક વીડિયો જાહેર કરીને આ અભિયાનની શરૂઆતની જાહેરાત કરી હતી. તે વીડિયોના સમર્થનમાં ત્રણ લાખથી વધુ લોકોએ સાઈન કરી છે.

અખબાર ધ ગાર્ડિયનના અહેવાલ મુજબ, તે વીડિયો છ મિલિયનથી વધુ વખત જોવામાં આવ્યો છે. ઝુંબેશની પ્રથમ રેલી આગામી બુધવારે દક્ષિણ લંડનમાં ક્લેફામ ગ્રાન્ડ વેન્યુ ખાતે યોજાશે. તેને કોમ્યુનિકેશન વર્કર્સ યુનિયન (CWU) ના જનરલ સેક્રેટરી ડેવ વોર્ડ અને નેશનલ યુનિયન ઓફ રેલ, મેરીટાઇમ એન્ડ ટ્રાન્સપોર્ટેશન વર્કર્સ (RMT) ના જનરલ સેક્રેટરી મિક લિન્ચ દ્વારા પણ સંબોધિત કરવામાં આવશે. ડેવ વોર્ડે કહ્યું છે - 'દર વખતે નવી કટોકટી ઊભી થાય છે અને દરેક વખતે કામદારોને કિંમત ચૂકવવાનું કહેવામાં આવે છે.'

ઈનફ ઈઝ ઈનફ દ્વારા માંગણી કરવામાં આવી છે કે, આગામી શિયાળામાં ગેસના ભાવમાં સંભવિત વધારો અટકાવવો જોઈએ, જેથી સામાન્ય પરિવારો પર બોજ ન વધે. આ અભિયાન સાથે જોડાયેલા લોકોએ જણાવ્યું કે, મોંઘવારીને કારણે હજારો લોકોનું જીવન સંઘર્ષમય બની ગયું છે.

દેશમાં એવા લાખો નાગરિકો છે જેઓ ખાદ્યપદાર્થો અને ઊર્જા બંનેની મોંઘવારી સહન કરવાની સ્થિતિમાં નથી. એક વર્ષમાં આ બંને વસ્તુઓના ભાવ ત્રણ ગણા વધી ગયા છે. ઈનફ ઈઝ ઈનફ કર્મચારીઓના વેતનમાં 'વાસ્તવિક' વધારાની માંગણી કરી છે. એટલે કે, આવો વધારો જે વધેલી મોંઘવારી કરતા વધારે છે. ઝુંબેશમાં દેશમાં લઘુત્તમ વેતન વધારીને 15 પાઉંડ પ્રતિ કલાક કરવા માટે કહેવામાં આવ્યું છે. હાલમાં, 23 વર્ષથી વધુ ઉંમરના કામદારો માટે લઘુત્તમ વેતન 9.50 પાઉંડ પ્રતિ કલાક છે. આ અભિયાનમાં શાળાઓમાં બાળકોને મફત ભોજન આપવાની યોજના શરૂ કરવાની માંગ પણ કરવામાં આવી છે.

મીડિયા રિપોર્ટ્સ અનુસાર, મોંઘવારી સામે બ્રિટનમાં સામાન્ય લોકોમાં ગુસ્સો વધી રહ્યો છે. થોડા દિવસો પહેલા લંડનમાં ટ્રેડ યુનિયન દ્વારા આયોજિત વિરોધ પ્રદર્શનમાં હજારો લોકો એકઠા થયા હતા. બીજી તરફ કેન્ટ પે, વોન્ટ પે ઝુંબેશ હેઠળ એક લાખથી વધુ લોકોએ આગામી ઓકટોબરથી ગેસ અને વીજળીના કનેકશન નહીં ચૂકવવાનો મેસેજ આપ્યો છે. આ અભિયાને આશા વ્યક્ત કરી છે કે, ત્યાં સુધીમાં 10 લાખથી વધુ લોકો તેમના અભિયાનમાં જોડાશે.