મણિપુરમાથી સાત સશસ્ત્ર આતંકવાદીઓની ધરપકડ
સરકારી સ્થાપનો અને સુરક્ષા દળોને વિસ્ફોટકો વડે નિશાન બનાવવાના કાવતરાનો પર્દાફાશ : સર્ચ ઓપરેશન શરૂ
મણિપુર તા.14 : આવીતકાલે સ્વતંત્રતા દિવસની ઉજવણી થશે .એ પહેલા સુરક્ષા એજન્સીઓ તેમજ પોલીસે ઘનિષ્ઠ ચેકિંગ શરુ કર્યુ છે અને 15 ઓગસ્ટ પૂર્વે મણિપુરના વિવિધ ભાગોમાંથી પ્રતિબંધિત પીપલ્સ લિબરેશન આર્મી (PLA) ના સાત સશસ્ત્ર આતંકવાદીઓની ધરપકડ કરવામાં આવી છે. પોલીસે આ જાણકારી આપી હતી.
થૌબલ જિલ્લાના પોલીસ અધિક્ષક એચ જોગેશચંદ્રએ એક પ્રેસ કોન્ફરન્સમાં જણાવ્યું હતું કે આસામ રાઈફલ્સને શનિવારે સવારે સ્વતંત્રતા દિવસની ઉજવણી દરમિયાન સરકારી સ્થાપનો અને સુરક્ષા દળોને વિસ્ફોટકો વડે નિશાન બનાવવાના કાવતરા અંગે માહિતી મળી હતી. તેમણે કહ્યું કે થોબલ જિલ્લા પોલીસ અને 16 આસામ રાઈફલ્સની સંયુક્ત ટીમ યારીપોક માર્કેટમાં પહોંચી અને વિસ્તારને ઘેરી લીધો અને સર્ચ ઓપરેશન શરૂ કર્યું. "ઈમ્ફાલ ઈસ્ટ, ઈમ્ફાલ વેસ્ટ, કાકચિંગ અને થોબલ જિલ્લામાં ઘણી જગ્યાએ સમાન ઓપરેશન હાથ ધરવામાં આવ્યા હતા," તેમણે જણાવ્યું હતું. સુરક્ષા દળોએ સાત આતંકવાદીઓની ધરપકડ કરી હતી અને હથિયારો અને વિસ્ફોટકો સાથે એક સગીરને પણ પકડ્યો હતો, એમ અધિકારીએ જણાવ્યું હતું.
"તપાસ પછી, એવું બહાર આવ્યું છે કે તેઓ ખીણના જિલ્લાઓમાં બિન-સ્થાનિકોને નિશાન બનાવી રહ્યા હતા, અને જૂન અને જુલાઈમાં અનુક્રમે કાકચિંગ અને એન્ડ્રો હુઇકેપમાં બે બિન-સ્થાનિકોની હત્યામાં સામેલ હતા." જોગેશચંદ્રએ જણાવ્યું હતું કે નવ એમએમ પિસ્તોલ, બેરેટા પિસ્તોલ, 35 કારતૂસ અને ગ્રેનેડ જપ્ત કરવામાં આવ્યા હતા. પોલીસે કહ્યું કે સ્વતંત્રતા દિવસની ઉજવણી પહેલા રાજ્યના વિવિધ ભાગોમાં કામગીરી ચાલી રહી છે અને સુરક્ષા વધારી દેવામાં આવી છે.