ચીની લશ્કરે અરુણાચલમાંથી ગુમ થયેલા ભારતીય કિશોરને શોધી કાઢયો: ટૂંક સમયમાં ભારત પરત આવશે: ભારતીય સેના
અરુણાચલ પ્રદેશનો જે યુવક તેના ગામમાંથી ગુમ થયો હતો તેને ચીનની પીપલ્સ લિબરેશન આર્મી (પીએલએ) દ્વારા શોધી કાઢવામાં આવ્યો છે. ભારતીય સેનાએ રવિવારે આ જાણકારી આપી છે. તેઝપુરના પીઆરઓ લેફ્ટનન્ટ કર્નલ હર્ષવર્ધન પાંડેએ એક નિવેદનમાં જણાવ્યું હતું કે, "ચીની સેનાએ અમને જાણ કરી છે કે તેમને અરુણાચલ પ્રદેશમાંથી એક ગુમ થયેલ છોકરો મળ્યો છે. તેના પરત આવવા માટે યોગ્ય પ્રક્રિયા કરવામાં આવી રહી છે."
યુવકની ઓળખ અરુણાચલ પ્રદેશના સિંગાલાના લુંગટા જોર વિસ્તારના રહેવાસી ૧૭ વર્ષીય મીરામ તરન તરીકે થઈ છે, જે ૧૮ જાન્યુઆરી, મંગળવારે ગુમ થઈ ગયો હતો.
અરુણાચલ પ્રદેશના સાંસદ તાપીર ગાઓએ ૧૯ જાન્યુઆરીએ જણાવ્યું હતું કે રાજ્યના અપર સિયાંગ જિલ્લામાંથી ચીની સૈનિકોએ ૧૭ વર્ષના બાળકનું અપહરણ કર્યું હતું. ગાઓએ કહ્યું કે અપહરણ કરાયેલ કિશોરની ઓળખ મીરમ તારોન તરીકે થઈ છે. તેમણે કહ્યું કે ચીની સેનાએ સેઉન્ગલા વિસ્તારના લુંગટા જોર વિસ્તારમાંથી આ ભારતીય કિશોરનું અપહરણ કર્યું હતું અને ટેરોનના મિત્ર જોની યિંગ, જે ભાગવામાં સફળ રહ્યો હતો, તેણે સ્થાનિક અધિકારીઓને અપહરણ વિશે જાણ કરી હતી. તાપીર ગાઓએ દાવો કર્યો હતો કે આ ઘટના તે બિંદુની નજીક બની હતી જ્યાંથી ત્સાંગપો નદી અરુણાચલ પ્રદેશમાં ભારતમાં પ્રવેશે છે.
૨૦ જાન્યુઆરીએ ભારતીય સેના દ્વારા કહેવામાં આવ્યું છે કે ચીનની સેનાનો હોટલાઇન પર સંપર્ક કરવામાં આવ્યો છે. ભારતીય સેનાએ પીપલ્સ લિબરેશન આર્મીને કહ્યું છે કે શિકાર અને જડીબુટ્ટીઓની શોધમાં ગયેલી ૧૭ વર્ષનો મીરામ તારોન પોતાનો રસ્તો ખોઈ બેઠો છે. પીપલ્સ લિબરેશન આર્મીને આ ભારતીય ટીનેજરને શોધી કાઢવા અને પ્રોટોકોલ મુજબ તેને ભારત પરત મોકલવા વિનંતી કરવામાં આવી છે.
તે જ સમયે, ચીનના વિદેશ મંત્રાલયના પ્રવક્તાએ કહ્યું હતું કે જંગનાન (ચીન અરુણાચલ પ્રદેશને દક્ષિણ તિબેટ અથવા જંગનાન કહે છે) ચીનના ઝિયાંગ ક્ષેત્રનો ભાગ છે. ચીને હંમેશા જંગનાન પર ભારતના ગેરકાયદેસર અતિક્રમણનો વિરોધ કર્યો છે. પીપલ્સ લિબરેશન આર્મી કાયદા અનુસાર સરહદને નિયંત્રિત કરે છે અને ગેરકાયદેસર સરહદ પ્રવેશ અને બહાર નીકળવા પર કડક કાર્યવાહી કરે છે.