ભાઈના રિસેપ્શનમાં નાચી રહેલા યુવકનું અચાનક મોત

આ સમગ્ર ઘટના કેમેરામાં કેદ થઈ હતી : એક ચુમ્મા તું મુજકો ઉધાર દઈ દે...ગીત પર નાચી રહેલા યુવકને હાર્ટએટેક આવ્યો, લોકો સમજતા રહ્યા મજાક

 બેતુલ, તા.૨૩ : મધ્ય પ્રદેશના બેતુલમાં લગ્નના રિસેપ્શનમાં ડાન્સ કરી રહેલા એક યુવકનું અચાનક મોત થયું હોવાની ઘટના સામે આવી છે. પ્રાપ્ત માહિતી અનુસાર યુવકના ભાઈનું રિસેપ્શન હોવાથી યુવક ડાન્સ ફલોર પર નાચી રહ્યો હતો ત્યારે જ અચાનક જ હાર્ટએટેક આવતા ઢળી પડ્યો હતો. આ સમગ્ર ઘટના કેમેરામાં કેદ થઈ હતી.

પ્રાપ્ત માહિતી યુવક 'એક ચુમ્મા તું મુજકો ઉધાર દઈ દે' ગીત પર ડાન્સ કરી રહ્યો હતો. ડાન્સ દરમિયાન જ તેને હાર્ટ એટેક આવ્યો હતો, જે બાદ તે ડાન્સ ફ્લોર પર પડી ગયો હતો. લોકોને લાગ્યું કે તે મજાક કરી રહ્યો છે. પરંતુ નજીક જઈને જોયું ત્યારે વાસ્તવિકતાની જાણ થતાં પરિવારના સભ્યો તેને તાત્કાલિક હોસ્પિટલ લઈ ગયા જ્યાં ડોક્ટરોએ તેને મૃત જાહેર કર્યો હતો.

આ ઘટના બેતુલના શાહપુર પોલીસ સ્ટેશન વિસ્તારના જમુન ધાના ગામની છે. અહીં એક રિસેપ્શનમાં ડાન્સ કરી રહેલા ૩૨ વર્ષીય યુવક અંતલાલ ઉઇકેનું મૃત્યુ થયું હતું.

અંતલાલ ડોરી ગામનો રહેવાસી હતો, જે તેના સંબંધી સોનુ કુમરેના લગ્નમાં જામુન ધના ગામમાં આવ્યો હતો. શુક્રવારે લગ્ન હતા અને શનિવારે રિસેપ્શન દરમિયાન ડાન્સ કરતી વખતે તેનું મોત થયું હતું.

શનિવારે રાત્રે રિસેપ્શનમાં યુવક અંતલાલ ઉઇકે ડાન્સ કરી રહ્યો હતો. તે ડાન્સ કરતી વખતે પડી ગયો અને ફરી ઊઠી જ શક્યો નહીં. તેને પડતો જોઈને મિત્રો અને અન્ય લોકો વિચારતા રહ્યા કે તે મજાક કરી રહ્યો છે. આ કારણે લાંબા સમય સુધી કોઈ તેની પાસે પહોંચ્યું પણ નહીં. જોકે, જ્યાં સુધી લોકોને ખબર પડી કે શું થઈ રહ્યું છે, ત્યાં સુધીમાં ઘણું મોડું થઈ ચૂક્યું હતું. વાસ્તવિકતા સામે આવતાં જ લગ્ન સ્થળ પર ગભરાટનો માહોલ જોવા મળ્યો હતો. યુવકને તાત્કાલિક હોસ્પિટલમાં લાવવામાં આવ્યો, જ્યાં તેને મૃત જાહેર કરવામાં આવ્યો.

રવિવારે યુવકનું પોસ્ટમોર્ટમ કરીને મૃતદેહ સ્વજનોને સોંપવામાં આવ્યો હતો. મૃતકના સંબંધી રામકિશોર ધુર્વેએ જણાવ્યું કે તે એક લગ્ન સમારોહમાં હાજરી આપવા આવ્યો હતો. નાચતા-નાચલા ઢળી પડ્યો હતો જેથી અમે અમને હોસ્પિટલ લઈ ગયા હતા, જ્યાં તેનુ મોત થયું હોવાનું જાણવા મળતા પરિવારમાં શોકનો માહોલ જોવા મળી રહ્યો છે.