એક યુવતી તેના પ્રેમી સાથે ઘરેથી ચાર વખત ભાગી ગઈ હતી પરંતુ દર વખતે તેનું સપનું અધૂરૂ રહી જતું હતું અંતે પોલીસ સ્ટેશનમાં સાકાર થયું સપનું

નવી દિલ્હી,તા. ૨૪: રોહતાસ જિલ્લાના ડેહરી સ્થિત મહિલા પોલીસ સ્ટેશન શુક્રવાર લગ્નના મંડપમાં ફેરવાઈ ગયું હતું. મહિલા પોલીસ સ્ટેશનના વડાની હાજરીમાં સ્ટેશનમાં મંત્રોચ્ચાર સાથે પ્રેમી-પ્રેમિકાએ એકબીજાને વરમાળા પહેરાવી હતી. ત્યારબાદ પ્રેમીએ પ્રેમિકાની સેંથીમાં સિંદુર પૂર્યું હતું અને સાત ફેરા લઈને લગ્ન પૂર્ણ થયા હતા.

મહિલા પોલીસ સ્ટેશનના વડા માધુરી કુમારીએ જણાવ્યું હતું કે ટંડવા ગામના પ્રેમી અભયકાંત અને પડુહાર ગામની પ્રેમિકા પ્રિયંકા વચ્ચે દ્યણા વર્ષોથી પ્રેમ સંબંધ હતો. છોકરા-છોકરીના દ્યરવાળા તેમના લગ્ન કરાવવા માટે તૈયાર ન હતા. લગ્ન માટે છોકરી પોતાના દ્યરેથી ચાર વખત ભાગી ગઈ હતી.

જોકે, આ વખતે છોકરીએ પોલીસ સ્ટેશનમાં ફરિયાદ નોંધાવી હતી. છોકરીની ફરિયાદના આધારે છોકરાને પોલીસ સ્ટેશન બોલાવ્યો હતો. છોકરાએ કહ્યું હતું કે તે લગ્ન માટે તૈયાર છે.

ત્યારબાદ પોલીસ સ્ટેશનમાં જ તેમના લગ્ન કરાવવાનું નક્કી કરવામાં આવ્યું હતું. તાત્કાલિક લગ્ન માટેનો સામાન મંગાવવામાં આવ્યો અને પંડિતજીને પણ બોલાવવામાં આવ્યા હતા. પોલીસ કર્મીઓની હાજરીમાં તેમના લગ્ન કરાવવામાં આવ્યા હતા. છોકરા અને છોકરીના પરિવારોને પણ બોલાવવામાં આવ્યા હતા.