નકલી હેલમેટ, કુકર તેમજ સિલિન્ડર વેચવાવાળા પર થશે કાર્યવાહી
સરકારનું સખ્ત વલણ : અનેકઇ-કોમર્સ કંપનીઓને પણ નોટીસ
નવી દિલ્હી તા. ૨૫ : સરકાર અકસ્માતની સ્થિતિમાં જીવલેણ સાબિત થતી નકલી ઉત્પાદનોના વેચાણ અને ઉત્પાદનને રોકવા માટે દેશવ્યાપી ઝુંબેશ શરૂ કરશે. સેન્ટ્રલ કન્ઝયુમર પ્રોટેકશન ઓથોરિટીએ જણાવ્યું હતું કે નકલી IS સ્ટેમ્પવાળા પ્રેશર કૂકર, ટુ વ્હીલર હેલ્મેટ અને LPG સિલિન્ડર વેચનારાઓ સામે દેશવ્યાપી અભિયાન ચલાવવામાં આવી રહ્યું છે.
CCPAના ચીફ કમિશનર નિધિ ખરેએ જણાવ્યું હતું કે રિટેલર્સ સાથે ઓનલાઈન પ્લેટફોર્મ પર આડેધડ રીતે વેચાણ કરવામાં આવી રહ્યું છે. અમે એમેઝોન, ફિલપકાર્ટ સહિત પાંચ ઈ-કોમર્સ કંપનીઓને પહેલાથી જ નોટિસ પાઠવી છે. આવા પ્રેશર કુકરનું અહીં વેચાણ કરવામાં આવી રહ્યું છે, જે બ્યુરો ઓફ ઈન્ડિયન સ્ટાન્ડર્ડ્સ (BIS)ના ધોરણોને પૂર્ણ કરતા નથી.
બજારોમાં આવા નકલી ઉત્પાદનોના વેચાણને ચકાસવા માટે, CCPAએ તમામ જિલ્લા કલેકટરને એવી કંપનીઓની તપાસ કરવા જણાવ્યું છે કે જેમની સામે ગ્રાહક અધિકારોના ઉલ્લંઘનની ફરિયાદો મળી છે. તમારા અધિકારક્ષેત્રમાં તપાસ કર્યા પછી, અમે આગામી બે મહિનામાં તેનો રિપોર્ટ મોકલીશું. ખરેએ જણાવ્યું હતું કે આ ઉપરાંત CCPA પણ વ્યકિતગત રીતે આ ઉત્પાદનો પર દેખરેખ રાખે છે. જયારે આવા કિસ્સાઓ સામે આવશે ત્યારે અમે આરોપીઓ સામે કેસ નોંધીશું.