સુપ્રીમકોર્ટમાં એકનાથ શિંદે જૂથની જીત :ચૂંટણી પંચની કાર્યવાહી અટકશે નહીં

ઉદ્ધવ ઠાકરે જૂથ દ્વારા દાખલ કરાયેલી અરજી ફગાવી દેવાઈ :બંધારણીય બેંચ ડેપ્યુટી સ્પીકરની સત્તા અને ધારાસભ્યો સામે ગેરલાયકાતની કાર્યવાહી કરવાના અધિકારના મુદ્દા પર વધુ સુનાવણી ચાલુ રાખશે.

નવી દિલ્હી : શિવસેના કેસની આજે સુપ્રીમ કોર્ટમાં સુનાવણી થઈ. સુપ્રીમ કોર્ટે ચૂંટણી પંચને શિવસેના પ્રતીક મુદ્દે આગળની કાર્યવાહી શરૂ કરવાનો આદેશ આપ્યો હતો. એકનાથ શિંદે જૂથને મોટી રાહત મળી છે. સુપ્રીમ કોર્ટે શિવસેના પ્રતિક કેસમાં ચૂંટણી પંચની કાર્યવાહી પરનો સ્ટે હટાવી લીધો છે. ઉદ્ધવ ઠાકરે જૂથ દ્વારા દાખલ કરવામાં આવેલી અરજી કોર્ટે ફગાવી દીધી છે. સુપ્રીમ કોર્ટની બંધારણીય બેંચ ડેપ્યુટી સ્પીકરની સત્તા અને ધારાસભ્યો સામે ગેરલાયકાતની કાર્યવાહીના અધિકારના મુદ્દા પર વધુ સુનાવણી ચાલુ રાખશે.

 ઉદ્ધવ ઠાકરે વતી વરિષ્ઠ વકીલ કપિલ સિબ્બલે દલીલો કરી હતી. સિબ્બલે કહ્યું કે આ બધું 20 જૂને શરૂ થયું જ્યારે શિવસેનાના ધારાસભ્ય એક સીટ હારી ગયા. ધારાસભ્ય દળની બેઠક બોલાવવામાં આવી હતી. પછી તેમાંથી કેટલાક ગુજરાત અને પછી ગુવાહાટી ગયા. તેમને હાજર થવા માટે બોલાવવામાં આવ્યા હતા અને એકવાર તેઓ હાજર ન થયા તો તેમને વિધાનસભામાં પદ પરથી હટાવી દેવામાં આવ્યા હતા.

સિબ્બલે કહ્યું કે પછી તેમણે કહ્યું કે અમે તમને પાર્ટીના નેતા તરીકે ઓળખતા નથી અને નવા વ્હિપ અધિકારીની નિમણૂક કરવામાં આવી હતી. ત્યારે ખબર પડી કે તેઓ ભાજપ સાથે અલગ સરકાર બનાવવા માંગે છે. 29 જૂનના રોજ, આ કોર્ટે આદેશ આપ્યો કે વિધાનસભા યોગ્ય વિચારણા કર્યા પછી આગળ વધે. તે પછી એવું કહેવામાં આવે છે કે વિશ્વાસનો મત સર્વોચ્ચ અદાલત સમક્ષની કાર્યવાહીના પરિણામને આધીન રહેશે. મતલબ કે મુખ્યમંત્રીનું કાર્યાલય અને વિધાનસભાની કાર્યવાહી આ કોર્ટના નિર્ણયને આધીન છે.

   સિબ્બલે કહ્યું કે જે ધારાસભ્યો અલગ થયા છે તે શિવસેનાના છે. તેઓ અલગ થઈને અન્ય પાર્ટી સાથે સરકાર બનાવી શક્યા હોત પરંતુ શિવસેના પર વર્ચસ્વના આધારે સરકાર બનાવી શક્યા ન હતા. સિબ્બલે કહ્યું કે જો ધારાસભ્યો અન્ય કોઈ પાર્ટી કે ભાગ સાથે જાય છે તો તેઓ પાર્ટીની સદસ્યતા ગુમાવે છે. તેઓ પોતે પાર્ટીની કમાન સંભાળી શકતા નથી. સિબ્બલે કહ્યું કે પાર્ટી તૂટવાની સ્થિતિમાં તેઓ પાર્ટીના સભ્ય તરીકે વિધાનસભામાં કેવી રીતે આવી શકે છે.