Gujarati News

રાજકોટ તા. ૩: પારેવડી ચોક પાસે મહાત્મા ગાંધી પ્લોટમાં રહેતી અસ્મા દિપક પારઘી (ઉ.વ.૨૨) નામની સગર્ભા અને તેના પતિ દિપક પર ભગવતીપરા ઓવર બ્રિજ નીચે કરણ સોલંકી, બકુલ સોલંકી, નરેશ સોલંકી સહિતે હુમલો કરી પેટમાં પાટી મારી દેતાં તબિયત બગડતાં સિવિલ હોસ્પિટલના ગાયનેક વિભાગમાં દાખલ કરવામાં આવી છે. બનાવ અંગે હોસ્પિટલ ચોકીના સ્ટાફે બી-ડિવીઝનમાં જાણ કરી હતી. અસ્માના કહેવા મુજબ તેણે દિપક સાથે દોઢ વર્ષ પહેલા લવમેરેજ કર્યા છે. હાલમાં પેટમાં નવ માસનો ગર્ભ છે. ઘર નજીક પતિ દિપકના મિત્રો દેકારો મશ્કરી કરતાં હોઇ પતિએ એ લોકોને દુર જવાનું કહી સમજાવતાં નજીકમાં રહેતાં કરણ, બકુલ સહિતને પોતાને આ ઠપકો અપાયો છે તેવું લાગતાં  ચડભડ થઇ હતી. એ પછી પોતાને પતિ ગુંદાવાડી હોસ્પિટલમાં દેખાડવા લઇ જતો હોઇ રસ્તામાં ભગવતીપરા પુલ નીચે કરણ સહિતે આવી પાવડા-લાકડાથી હુમલો કરી પતિને મારકુટ કરી પોતાને પેટમાં પાટા મારી દીધા હતાં. પોલીસે આ અંગે તપાસ હાથ ધરી છે.