Gujarati News

Gujarati News

News of Thursday, 6th May 2021

પીડીયુ મેડિકલ કોલેજના ૧૯૦ તબિબી શિક્ષકોના સુત્રોચ્ચારઃ કોરોના વોરિયર્સ સાથે સતત અન્યાયઃ માંગણીઓ પુરી ન થાય તો હડતાલ

વહિવટી વિલંબ એ અત્યાચાર...નહિ ચાલે નહિ ચાલે...બેનર સાથે સુત્રોચ્ચાર

પીડીયુ મેડિકલ કોલેજ ખાતે તબિબી શિક્ષકોએ પડતર માંગણીઓ પુરી કરવામાં નહિ આવે તો વિરોધ પ્રદર્શન શરૂ થશે તેવી ચિમકી ઉચ્ચારી બેનરો સાથે સુત્રોચ્ચાર કર્યા હતાં. (ફોટોઃ સંદિપ બગથરીયા)

રાજકોટ તા. ૬: ગુજરાત રાજ્યની સરકારી મેડિકલ કોલેજોના ૧૩૦૦થી વધુ તબિબી શિક્ષકો (પ્રોફેસર્સ)ની અનેક પડતર માંગણીઓનો લાંબા સમયથી ઉકેલ આવ્યો ન હોઇ અને આ બાબતે અનેક વખત રજૂઆતો કરવા છતાં વાજબી અને ન્યાયિક પ્રશ્નોનો હલ થયો ન હોઇ હવે રાજકોટ પીડીયુ મેડિકલ કોલેજના ૧૯૦ તબિબી પ્રોફેસરો કે જે કોવિડ-૧૯માં નિરંતર ફરજ બજાવી રહ્યા છે તેઓ સોમવારથી રાજ્યવ્યાપી આંદોલનમાં સામેલ થાય તેવી શકયતા છે.

આ મામલે આજે સિનીયર પ્રોફેસેર ડો. કમલ ડોડીયાએ જણાવ્યું હતું કે ચોવીસ કલાકમાં આપણને સારું રિઝલ્ટ મળે તેવી આશા રાખી હતી. પરંતુ હજુ કોઇ ઉકેલ આવ્યો નથી. તેમણે જણાવ્યું હતું કે આરોગ્ય વિભાગના અન્ય ઘટકો હડતાલ પાડી પોતાની માંગણીઓ મંજુર કરાવવામાં સફળ થયા છે. ત્યારે તબિબી શિક્ષકોના નમ્ર કાર્યદક્ષ સ્વ્ભાવ અને સરકાર પર ભરોસો રાખ્યા છતાં કોઇ કાર્યવહી કરવામાં આવી નથી. આ કારણે તબિબી શિક્ષકોમાં ભારે રોષ ફેલાયો છે. હવે પડતર પ્રશ્નોનો નિવેડો નહિ આવે તો ગુજરાતભરના સરકારી તબિબી પ્રોફેસરો હડતાલ પર ઉતરવા મજબૂર થશે. અમારી તબિબી શિક્ષકોની પડતર માંગણીઓ આ મુજબ છે.

(૧) તમામ એડહોક તબિબી શિક્ષકોની સેવા વિનીમયીત કરવામાં આવે, એક જ સ્થાઇ ઠરાવથી આદેશ કરી નિયમિત કરવામાં આવે. (૨)રેગ્યુલર તબિબી શિક્ષકોની બાકી રહેલી સેવા વિનિયમિત અને સેવા સળંગના ઓર્ડર કરવામાં આવે, એક જ સ્થાઇ ઠરાવથી આદેશ કરવામાં આવે. (૩) ૨૦૧૭થી સાતમા પગાર પંચ મુજબ નવા એનપીએ અને પર્સનલ પે મંજુર કરવામાં આવે, પગારની મહત્તમ મર્યાદા ૨૦૧૭ના ઠરાવ મુજબ રૂ. ૨,૩૭,૫૦૦ કરવામાં આવે. (૪) સીએએસ અને ટીકૂ માટે એલિજિબલ તબિબી શિક્ષકોને સીએએસ અને ટીકૂના આદેશો તુરત કરવામાં આવે (૫) તબિબી શિક્ષણમાં બાકી રહેલા માત્ર એડહોક ટ્યુમરને ૭મા પગાર મુજબનો પગાર મંજુર કરવામાં આવે. તેવીજ રીતે જીએમઆરએસમાં લીન પર ફરજ બજાવતાં સરકારી તબિબી શિક્ષકોને ૭મા પગારપંચ મુજબ પગાર આપવો. (૬) સીએએસ બાદ નામાભિધાનની ૨૦૧૭થી પડતર ફાઇલનો તુરત આદેશ કરવામાં આવે. (૭) બાકી રહેલા ૧૫ ટકા સિનિયર ટ્યુટર માટે ત્રીજુ ટીકૂ અને ૧૦ ટકા સિનિયર પ્રાધ્યાપકો માટે હેગના આદેશો તુરત કરવામાં આવે. (૮) તમામ ડીપીસીના તુરત આદેશો કરવામાં આવે. (૯) આરોગ્ય વિભાગ અંતર્ગત કરવામાં આવેલ તમામ એડહોક કે જીપીએસસી સેવાઓને હાલની સેવા સાથે જોડવાની પોલીસી ફાઇલને તુરત મંજુર કરવામાં આવે. (૧૦) જીપીએસસી અને ડીપીસી નિયમિત રીતે દર વર્ષે કરવામાં આવે. તેમજ સીએએસ-ટીકૂના આદેશો નિયમિત માસ્કિ રીતે થાય. (૧૧) હાલ ફિડર કેડરમાં એડહોક સેવા બજાવતાં તમામ તબિબી શિક્ષકો માટે જીપીએસસી પરિક્ષાઓ કરવામાં આવે. (૧૨) જીપીએસસી પરિક્ષાઓમાં સરકારી મેડિકલ કોલેજો અને સંલગ્ન હોસ્પિટલમાં ફરજ બજાવતાં પૂર્ણકાલીન શિક્ષકોને પ્રાથમિકતા આપવામાં આવે. (૧૩)કરારીય નિમણુંક તુરંત બંધ કરવામાં આવે. (૧૪) દસ વર્ષની નિયમિત સેવા બાદ વિકલ્પ આપી પ્રાઇવેટ પ્રેકટીસ કરવાની છૂટ આપવામાં આવે.

ગુજરાતના ફ્રન્ટ લાઇન કોરોના વોરિયર્સ (તબિબી શિક્ષકો)ની આ પડતર માંગણીઓનો ઉકેલ ન આવતાં વિરોધ પ્રદર્શન શરૂ કરવામાં આવશે તે અંગે રાજ્યભરના સરકારી તબિબી શિક્ષકોએ મુખ્યમંત્રીશ્રી વિજયભાઇ રૂપાણીને પણ વધુ એક વખત રજૂઆત કરી છે. અગાઉ ૨૭/૦૮/૨૦, ૨૬/૦૮/૨૦, ૧૫/૦૩/૨૧ના રોજ પણ રજૂઆતો કરી હતી. ફ્રન્ટલાઇન કોરોના વોરિયર્સ તબિબી શિક્ષકો સતત રાજ્ય સરકારની સાથે છે, મહામારીના અંત સુધી સાથે રહેવા તન-મનથી સાથ આપવા કટીબધ્ધ છે છતાં ઘોર અન્યાય કરવામાં આવી રહ્યો હોઇ ના છુટકે આંદોલનનો માર્ગ અપનાવવો પડે તેવી હાલત ઉભી થઇ છે. જો રાજકોટના તબિબી શિક્ષકો હડતાલમાં જોડાશે તો કોવિડ-૧૯ની સારવારમાં ભારે વિક્ષેપો ઉભા થઇ શકે તેવો ભય છે.

આજે તબિબી શિક્ષકોએ આગેવાન ડો. કમલ ડોડીયા, ડો. ઉમેદ પટેલ, ડો. મુકેશ પટેલની રાહબરીમાં મેડિકલ કોલેજ ખાતે એકઠા થઇ સુત્રોચ્ચાર કરી પોતાની માંગણીઓ પુરી કરવા રજૂઆત કરી હતી. જો કે આ વખતે કોવિડ-૧૯ની ફરજમાં સામેલ એક પણ તબિબી શિક્ષક સામેલ થયા નહોતાં. તેઓ પોતાની ફરજ પર જ હાજર હતાં.

(4:01 pm IST)
  • બીજેપી સાંસદ મહિલા સાધ્વી પ્રજ્ઞાની જીભ લપસી : મમતા બેનર્જીને ' તાડકા ' નું સંબોધન કર્યું : ત્રીજી વખત પશ્ચિમ બંગાળના મુખ્યમંત્રી તરીકે મમતા બેનર્જીની સોગંદવિધિ સમયે વિવાદિત વિધાન કરી રાષ્ટ્રપતિ શાસનની માંગ કરી access_time 12:23 pm IST

  • ત્રણ લોકસભા અને આઠ વિધાનસભાની પેટાચૂંટણીઓ મુલતવી રહી કોરોના મહામારીની બીજી લહેરને કારણે ચૂંટણી પંચે દાદરા નગર હવેલી સહિત ત્રણ લોકસભાની અને આઠ વિધાનસભાની પેટાચૂંટણીઓ હાલ પૂરતી મુલતવી રાખેલ હોવાનું જાહેર કરેલ છે. access_time 9:36 pm IST

  • કેરળમા બેકાબૂ બનેલા કોરોનાને કાબુમા લેવા કેરળમાં શનિવાર ૮ મે થી ૧૬ મે સુધી સંપૂર્ણ લોકડાઉનની જાહેરાત કરતું રાજ્ય પ્રશાસન : દેશના ૭મા રાજ્યમાં લોકડાઉન લદાયુ ચૂંટણી પૂર્ણ થયા બાદ નવા મુખ્યપ્રધાનના શપથ ગ્રહણ બાકી હોવાથી રાજ્ય પ્રશાસનએ આજે લોકડાઉન લાદવાનો નિર્ણય લીધો હતો. access_time 11:32 am IST