Gujarati News

રાજકોટ તા. ૫: શહેરમાં તસ્‍કરોએ પણ હવે ઉપાડો લીધો છે. કાલાવડ રોડ પર આવેલા રૂડાનગરમાં રજપૂત કારખાનેદારના બંધ મકાનને નિશાન બનાવી તસ્‍કરો સાતથી આઠ લાખની માલમત્તા ઉસેડી જતાં પોલીસે તપાસનો ધમધમાટ શરૂ કર્યો છે.

જાણવા મળ્‍યા મુજબ રૂડાનગર-૩ શેરી નં. ૯માં પુષ્‍પરાજ મકાનમાં ચોરી થયાની જાણ થતાં યુનિવર્સિટી પોલીસ સ્‍ટેશનના અધિકારીઓએ પહોંચી તપાસ શરૂ કરી હતી. મકાન માલિક પ્રવિણભાઇ મેરૂભાઇ ભટ્ટી (રજપૂત)એ પોલીસને જણાવ્‍યું હતું કે ગઇકાલે તેઓ મકાનને તાળા લગાવી પોતાના બહેન કે જે સોમનાથ વેરાવળ રહે છે તેઓ બિમાર હોઇ તેમની ખબર કાઢવા ગયા હતાં. પાછળથી રેઢા ઘરમાં ચોરી થઇ હતી.

આજે સવારે પડોશીએ ઘરના દરવાજાના તાળા તૂટેલા જોતાં ફોનથી જાણ કરતાં પ્રવિણભાઇ સહિતના લોકો સોમનાથથી પરત બપોરે રાજકોટ પહોંચ્‍યા હતાં. ઘરમાં તપાસ કરતાં તસ્‍કરો રોકડા રૂા. ૫૦ હજાર અને સોના ચાંદીના દાગીના મળી સાતથી આઠ લાખની માલમત્તા ચોરી ગયાનું જણાયું હતું.  પોલીસે ઘટના સ્‍થળ આસપાસના સીસીટીવી કેમેરા ચેક કરતાં બે શકમંદ શખ્‍સ જોવા મળ્‍યા હોઇ તે અંગે તપાસ શરૂ કરી છે. પીઆઇ એ. બી. જાડેજા, પીએસઆઇ એ. બી. જાડેજા, પીએસઆઇ એમ. આર. ઝાલા, અનુજભાઇ અને ડી. સ્‍ટાફની ટીમે તપાસનો ધમધમાટ શરૂ કર્યો છે. ડોગ સ્‍ક્‍વોડ અને ફિંગર પ્રિન્‍ટ નિષ્‍ણાંતોને પણ મદદ માટે બોલાવાયા હતાં.