Gujarati News

રાજકોટ તા. ૯: મા તે મા બીજા વગડાના વા...આ કહેવતની સાવ ખોટી પાડે એવી ઘટના ગોંડલમાં બની છે. રાજકોટ માવતર ધરાવતી અને એક વર્ષથી ગોંડલના યુવાન સાથે મૈત્રીકરારથી રહેતી યુવતિને ત્યાં પડોશમાં જ રહેતાં યુવાન સાથે પ્રેમ થઇ જતાં એ પ્રેમીએ પોતે પાંચ મહિનાના બાળકને નહિ સાચવે તેમ કહેતાં આ પ્રેમાંધ જનેતા નિર્દયી બની ગઇ હતી અને પ્રેમીની મદદથી ફૂલડા જેવા પાંચ મહિનાના દિકરાને રાજકોટ માવતરે લાવી ઝેરી દવાના સવાર-સાંજ બે ડોઝ આપી મોતને ઘાટ ઉતારી દીધો હતો અને બાદમાં બહારગામ રહેલા પતિને  દિકરાનું બિમારીથી મોત થયું છે એવી ખોટી કહાની જણાવી દિકરાની લાશને ગોંડલમાં દફનાવી દીધી હતી. દિકરાના મોતના છ દિવસ બાદ આ પ્રેમાંધ મા પડોશી પ્રેમી સાથે ગાયબ થઇ જતાં સમગ્ર કાવતરાથી અજાણ અને દિકરો બિમારીથી જ મૃત્યુ પામ્યાનું સમજતાં પતિને દાળમાં કંઇક કાળુ લાગતાં ગોંડલ સીટી પોલીસમાં અરજી કરી હતી. આ અરજીની તપાસમાં ચોંકવનારા હત્યાના કાવત્રાનો પર્દાફાશ થયો છે. સવા મહિના પહેલાની હત્યાની ઘટનામાં આજે બપોર બાદ પોલીસ દાટી દેવાયેલા બાળકના મૃતદેહને બહાર કાઢી આગળ કાર્યવાહી કરશે.

સમગ્ર ઘટનાની વિગતો જોઇએ તો ગોંડલ રહેતાં હિતેષ પટેલના પાંચ મહિનાના પુત્રનું તા. ૧૯/૨/૨૧ના રોજ મૃત્યુ થયું હતું. એ પછીના છ દિવસ બાદ તેની પત્નિ અમિષા અને બાજુમાં રહેતો મુન્નો ગાયબ થઇ ગયા હતાં. શોધખોળ કરવા છતાં પત્તો ન મળતાં અને દિકરાના મોતના છ દિવસ બાદ જ પત્નિ જતી રહી હોઇ હિતેષને શંકા ઉપજતાં તેણે ગોંડલ સીટી પોલીસમાં એક અરજી કરી હતી. પોલીસે ઘટનાને ગંભીર ગણી તપાસનો ધમધમાટ શરૂ કર્યો હતો.

હિતેષે પોલીસને જણાવ્યું હતું કે પોતે ડ્રાઇવીંગ કામ કરતો હોઇ જેથી મોટે ભાગે બહારગામ જ રહેવાનું થાય છે. એક વર્ષ પહેલા તેણે રાજકોટ માંડા ડુંગર પાસે રહેતી અમિષા (કોળી) સાથે મૈત્રી કરાર કર્યા છે અને એક દિકરો જન્મ્યો હતો જે પાંચ મહિનાનો હતો. પોતે ડ્રાઇવીંગના કામ માટે મોટે ભાગે બહાર રહેતો હોઇ પડોશમાં રહેતાં મુન્નાને ભલામણ કરી હતી કે તારી ભાભીને કંઇ ઘરનું કામકાજ હોય કે કંઇ ચીજવસ્તુઓ લેવી હોય તો તું મદદ કરજે. એ પછી પોતે ઘરે ન હોય ત્યારે પત્નિ અમિષાને કંઇ કામ હોય તો તે મુન્નાને બોલાવતી હતી. આ દરમિયાન એ બંને વચ્ચે શું રંધાયુ હતું તેની પોતાને ખબર નહોતી.

દિકરાના મોતના છઠ્ઠા દિવસે જ જનેતા અને પડોશી મુન્નો ગાયબ થઇ ગયા હોઇ પોલીસને પણ અજુગતુ લાગ્યું હતું અને અરજીની ગંભીરતાથી તપાસ શરૂ કરી હતી. એકાદ મહિનાની તપાસને અંતે અમિષા અને તેની સાથે ભાગેલા મુન્નાને પરમ દિવસે શોધી કાઢ્યા હતાં. આ બંનેએ પહેલા તો પોતે કંઇ જ જાણતા ન હોવાનું અને બાળકનું બિમારીથી જ મોત થયાનું રટણ કર્યુ હતું. પરંતુ વિશેષ પુછતાછ થતાં ચોંકાવનારી વિગતો સામે આવી હતી.

પોલીસ તપાસમાં ખુલ્યા મુજબ અમિષા ઘરના કામ માટે પતિની ગેરહાજરીમાં મુન્નાને બોલાવતી હોઇ વારંવારના આ ક્રમને કારણે તેણીને મુન્ના સાથે આંખ મળી ગઇ હતી. જો કે મુન્નાએ પોતે બાળક સાથે નહિ અપનાવે તેવું કહેતાં અમિષાએ પ્લાન ઘડ્યો હતો અને મુન્નાને વાત કરી ૧૮/૨/૨૧ના રોજ ઘઉંમાં રાખવાની ઝેરી દવાના ટીકડા તેના મારફત મંગાવી લીધા હતાં.

એ પછી બીજા દિવસે ૧૯મીએ સવારે અમિષાએ પતિને દિકરાને તાવ આવે છે અને બિમાર છે, રાજકોટ બતાવવા જવું પડશે તેવી વાત કરી હતી. હિતેષને ગાંધીનગરનુ ભાડુ હોઇ તે પુત્રને રાજકોટ બતાવી આવવાનું કહી રૂ. પાંચસો આપી રવાના થઇ ગયો હતો. બીજી તરફ પ્લાન મુજબ અમિષા દિકરાને લઇને રાજકોટ માંડા ડુંગર પાસે માવતરે પહોંચી હતી. અહિ તેણે સવારે દિકરાને દૂધમાં ભેળવી ઝેરી દવાનો ભુક્કો પીવડાવ્યો હતો. એ પછી સાંજે ફરીથી આવુ જ કરી બે ડોઝ આપ્યા હતાં.

દિકરો બેભાન થઇ જતાં તેને અમિષા સિવિલ હોસ્પિટલે લાવી હતી. અહિ તબિબે તેને મૃત જાહેર કરતાં તેણીએ બાળક બિમાર હતું અને પોસ્ટ મોર્ટમ નથી કરવું એવી આજીજી કરી હતી અને ત્યાંથી બાળકનો મૃતદેહ લઇ નીકળી ગઇ હતી. એ પછી પતિને ફોન કરી જાણ કરી હતી કે દિકરાને તાવ હતો, રાજકોટમાં બાટલા ચડાવ્યા છે પણ તે બચી શકયું નથી. આ વાત થયા બાદ પોતે લાશ લઇને ગોંડલ પહોંચી હતી અને પ્રેમી મુન્ના સાથે મળી લાશને ગોંડલમાં જ દફનાવી દીધી હતી.

બીજી તરફ હિતેષ પણ દિકરાનું બિમારીથી મોત થયાના વાવડ સાંભળી તાબડતોબ ગોંડલ પહોંચી ગયો હતો. તે સમગ્ર કાવત્રાથી અજાણ હતો. એ પછી દિકરાના મોતના છઠ્ઠા દિવસે પત્નિ અને મુન્નો ગાયબ થઇ જતાં સમગ્ર ઘટના તેને શંકાસ્પદ લાગી હતી અને ગોંડલ સીટી પોલીસમાં અરજી કરી હતી. આ અરજીના આધારે ભેદ ખુલ્યો છે.

અમિષાએ ઝેરી ટીકડીઓ રાજકોટમાં માંડા ડુંગર વિસ્તારમાં માવતરના ઘરે પીવડાવી હોઇ જેથી હવે પછીની ઘટનાની તપાસ આજીડેમ પોલીસ મથકના પીઆઇ વી. જે. ચાવડા, જાવેદભાઇ રિઝવી, સ્મીતભાઇ વૈશ્વાણી સહિતનો સ્ટાફ આગળ તપાસ કરશે.

બપોર બાદ ગોંડલમાં જે જગ્યાએ બાળકનો મૃતદેહ દફનાવાયો છે ત્યાં સ્થાનિક પોલીસને સાથે રાખી એસડીએમની હાજરીમાં આજીડેમ પોલીસ મૃતદેહ બહાર કઢાવી રાજકોટ ફોરેન્સિક પોસ્ટ મોર્ટમ માટે ખસેડશે અને આગળ કાર્યવાહી કરશે. આ ઘટનાને ચકચાર મચાવી દીધી છે.

અમિષાનું હિતેષ સાથે ચોથુ ઘર

પ્રેમી માટે ફૂલડા જેવા પાંચ મહિનાના દિકરાને પતાવી દેનાર અમિષાનું ગોંડલના હિતેષ સાથે ચોથુ ઘર છે. એ પછી તેને ત્યાં પડોશમાં રહેતાં મુન્ના સાથે પ્રેમ થઇ ગયો હતો અને તેના કારણે દિકરાને પતાવી દીધાની વિગતો ખુલતાં આ તે કેવી મા? એવા સવાલો ઉભા થયા છે.