Gujarati News

રાજકોટ તા. ૧૦:સમરસ હોસ્ટેલ ખાતેના સિવિલ હોસ્પિટલના કોવિડ હેલ્થ સેન્ટરમાં તબિબો અને નર્સિંગ સ્ટાફની સતત જહેમતથી દર્દીઓ સાજા થઇ રહ્યા છે. તો આ સ્ટાફની સાથે આઉટસોર્સિંગ એજન્સીનો સ્ટાફ પણ સતત પોતાની ફરજ બજાવી રહ્યો છે. સેવા સાથે ઇમાનદારીના દાખલા પણ તે બેસાડી રહ્યા છે. તા. ૯/૫ના રોજ સવારે કોરોનાના દર્દીના પલંગની ચાદર બદલવાની કામગીરી વખતે પેશન્ટ એટેન્ડન્ટ મહેશ મકવાણા અને કુ. તેજલ ચાઉઉ તથા સેનેટરી ઇન્સ. રાજ હુણને ચાદર નીચેથી રોકડ રકમ મળતાં તેણે તુરત જ એજન્સી કોન્ટ્રાકટર એમ. જે. સોલંકીના સમરસ ખાતેના એચઆર મેનેજર મહિપાલસિંહ જેઠવાને જાણ કરતાં તેમણે અધ્યક્ષ અને પ્રાંત અધિકારીશ્રી ચરણસિંહ ગોહિલને જાણ કરી હતી.

તેમણે જ્યાંથી રકમ મળી હતી એ બેડના દર્દીની હિસ્ટ્રી ચેક કરાવી હતી. એ દર્દી મૃત્યુ પામનાર રમેશભાઇ માનસિંગભાઇ ખીમાનીયાની હોવાનું સ્પષ્ટ થતાં તેમના સગાનો સંપર્ક કરાવ્યો હતો. વહિવટી તંત્રએ નાના કર્મચારીઓની ઇમાનદારીને બીરદાવી હતી.  તેમજ તેમની કામગીરીના પણ વખાણ કર્યા હતાં. આ કર્મચારી ભાઇ-બહેનો દર્દીઓના હાથ પગ દબાવવા, માથુ દબાવી આપવું, માથામાં તેલ નાખી આપવા સહિતની સેવા પણ કરે છે.