Gujarati News

રાજકોટઃ માધાપર ચોકડીથી બેડી ચોકડી તરફ જતાં પુલ ઉપર અતિથિ દેવો ભવ હોટેલ નજીક સવારે ટેન્કર નં. જીજે૦૬એડી-૮૮૦૨ના ચાલકે મારૂતિ વેન નં. જીજે૦૩સીએ-૮૯૩૮ને ઠોકરે ચડાવતાં વેનમાં ભારે નુકસાન થયું હતું અને રોડ ડિવાઇડર પર  ચડી ગઇ હતી. વેનના ચાલક મોરબી રોડ સેટેલાઇટ ચોક સિલ્વર પાર્ક-૧માં રહેતાં ઘનશ્યામભાઇ નરસીભાઇ પાટડીયા (ઉ.વ.૪૦)ને ઇજાઓ થતાં સિવિલ હોસ્પિટલમાં ખસેડાયા હતાં. ચોકીના હેડકોન્સ. રાજુભાઇ ગીડા અને અનોપસિંહ ઝાલાએ ગાંધીગ્રામ પોલીસને જાણ કરી હતી. ઘનશ્યામભાઇ વેન ડ્રાઇવીંગનું કામ કરે છે. આ વેન બગડી ગઇ હોઇ માધાપર ચોકડી પાસે મિત્રના ગેરેજમાં રિપેરીંગમાં મુકી હતી. આજે રિપેર થઇ જતાં સવારે તેઓ વેન લઇ ઘર તરફ જવા નીકળ્યા ત્યાં જ પાછળથી ટેન્કરના ચાલકે ઠોકરે ચડાવી દીધી હતી. તસ્વીર ભાવેશભાઇ લહેરૂએ મોકલી હતી.