Gujarati News

રાજકોટ તા. ૨૩: રેલનગર રૂષીકેશ પાર્કમાં રહેતાં અને ભગવતીપરામાં કરિયાણાની દૂકાન ચલાવતાં વૃધ્ધ ટુવ્હીલરમાં ગાંજો લઇને નીકળ્યા છે તેવી બાતમી પરથી તેને રેલનગર સાધુવાસવાણી કુંજ રોડ પરથી શહેર એસઓજીની ટીમે પકડી લઇ ૬૧૦ ગ્રામ ગાંજો કબ્જે કરી ધરપકડ કરી છે.

એસઓજી ટીમ પેટ્રોલીંગમાં હતી ત્યારે બાતમી મળતાં જીજે૦૩ડીકયુ-૭૯૧૪ નંબરના એકટીવા સાથે સાધુવાસવાણી કુંજ રોડ પરથી એક વૃધ્ધ મળતાં પાક્કી બાતમી હોઇ તેને અટકાવી તલાશી લેતાં ડેકીમાંથી રૂ. ૬૧૦૦નો ગાંજો મળી આવતાં એફએસએલ અધિકારી પાસે ખાત્રી કરાવી પ્ર.નગર પોલીસ સ્ટેશનમાં એનડીપીએસ એકટ હેઠળ ગુનો દાખલ કરાવ્યો હતો.

ઝડપાયેલા વૃધ્ધે પોતાનું નામ સુરેશ ગોૈરીશંકરભાઇ જોષી (ઉ.વ.૬૬-રહે. રેલનગર રૂષીકેશ પાર્ક-૩ શિવલહેરી મકાન) જણાવ્યું હતું. તેની પાસેથી ગાંજો, વાહન મળી રૂ. ૩૬૧૦૦નો મુદ્દામાલ કબ્જે કરાયો હતો. તેણે રાજકોટમાંથી જ એક શખ્સ પાસેથી ગાંજો મેળવ્યાનું અને પોતાને પીવા માટે લીધાનું રટણ કર્યુ હતું. જો કે કોવિડ ટેસ્ટ બાદ પોલીસ વિશેષ પુછતાછ કરશે.

પોલીસ કમિશનરશ્રી મનોજ અગ્રવાલ, જેસીપી ખુરશીદ અહેમદ, ડીસીપી પ્રવિણકુમાર મીણા, ડીસીપી મનોહરસિંહ જાડેજા, એસીપી ક્રાઇમ ડી. વી. બસીયા અને પીઆઇ આર. વાય. રાવલની રાહબરીમાં આ કામગીરી થઇ હતી.