Gujarati News

ﾠરાજકોટઃ કોરોના કાળના બે વર્ષ સુધી નવરાત્રી સહિતના ઉત્‍સવોથી દૂર રહેલા લોકો આ વર્ષે મનભરીની નવરાત્રી ઉત્‍સવની ઉજવણી કરી રહ્યા છે. રાજકોટમાં સતત પંદર વર્ષથી અકિલા બેસ્‍ટ ઓફ ધ બેસ્‍ટ રાસોત્‍સવનું આયોજન કરનારા આયોજકો પણ આ વખતે ખેલૈયાઓને મોજ કરાવવા મેદાને આવી ગયા છે. સતત પંદર વર્ષથી રાજકોટમાં બેસ્‍ટ ઓફ બેસ્‍ટ રાસોત્‍સવમાં યોજાય છે. પ્રેસ ફોટોગ્રાફર અશોક બગથરીયા, ધર્મેન્‍દ્રસિંહ ઝાલા અને તેમની સમગ્ર ટીમ દ્વારા આ વર્ષે ૧૫૦ ફુટ રીંગરોડ પર શિતલ પાર્કચોક, સોનમ ગરબા ગ્રાઉન્‍ડ ખાતે તા.૬/૧૦ના રોજ ગુરૂવારે સાંજે ૭થી ૧૦.૩૦ સુધી ભવ્‍ય રાસોત્‍સવ યોજાશે. જેમાં શહેરના તમામ અર્વાચીન રાસોત્‍સવના વિજેતા-ચુનંદા ખેલૈયાઓ વચ્‍ચે બેસ્‍ટ ઓફ ધ બેસ્‍ટ નો ખરાખરીનો જંગ જામશે.

અકિલા બેસ્‍ટ ઓફ ધ બેસ્‍ટ રાસોત્‍સવમાં ઓરકેસ્‍ટ્રા ટીમમાં જીલ એન્‍ટરટેઇનમેન્‍ટ એન્‍ડ મિડીયાના નેજા તળે ગાયકો વિશાલ પંચાલ, અશ્વિની મહેતા સહિતના રંગ જમાવશે. જયારે ઋષી દવે અને તેની સાથે આકાંક્ષા ગોંડલીયા એન્‍કરીંગની જવાબદારી નિભાવશે. આ સમગ્ર રાસોત્‍સવનું અકિલા ન્‍યૂઝ ડોટ કોમના ફેસબુક પેઇજ અને ડેન આરસીસી કેબલ નેટવર્ક(ચેનલ નં. ૫૯૬) ઉપર જીવંત પ્રસારણ થશે. જેથી દરેક લોકોને ઘરે બેઠા અને મોબાઇલ ફોન મારફત દુનિયાના કોઇપણ છેડે બેઠા બેઠા આ રાસોત્‍સવની મોજ માણી શકશે.