રાજકોટમાં પતંગના દોરાથી ગળુ કપાતાં યુવાનનું મોતઃ દોરાથી ઇજાના પચ્ચીસ જેટલા બનાવો
રાજકોટઃ શહેરમાં પતંગનું પર્વ દર વખતની જેમ આ વખતે પણ લોહીયાળ બન્યું હતું. જેમાં રૈયા ૧૫૦ ફુટ રીંગ રોડ ટેલિફોન એક્ષચેન્જ પાસે ગળામાં પતંગનો દોરો ફસાતાં ગળુ કપાઇ જતાં ગાંધીગ્રામ નાણાવટી ચોક સ્ટર્લિંગ પાછળ નંદનવાટીકા એપાર્ટમેન્ટમાં રહેતાં ૨૧ વર્ષના યુવાન ઉત્સવ ચેતનભાઇ વ્યાસનું કમકમાટી ભર્યુ મોત નિપજતાં પરિવારજનોમાં કલ્પાંત સર્જાયો હતો. યુવાન એકટીવા હંકારી ઘરેથી બહાર જતો હતો ત્યારે આ બનાવ બન્યો હતો. ગાંધીગ્રામના પીએસઆઇ એ. વી. પીપરોતરે જરૃરી કાર્યવાહી કરી હતી.
પતંગના દોરાથી ઇજા થવાના પચ્ચીસ જેટલા બનવો સાંજના ચાર સુધી નોંધાયા હતાં. સિવિલ હોસ્પિટલમાં પંદરેક લોકોને ઓપીડી સારવાર અપાયાનું અને અન્યોએ ખાનગી હોસ્પિટલમાં સારવાર લીધાનું જાણવા મળ્યું છે. તસ્વીરમાં પતંગના દોરાથી ગંભીર રીતે ઘાયલ યુવાન રસ્તા પર લોહીના ખાબોચીયામાં નજરે પડે છે. તેને હોસ્પિટલમાં ખસેડાયો હતો. પરંતુ સારવાર કારગત નિવડી નહોતી. (ફોટોઃ અશોક બગથરીયા)