Gujarati News

(પરેશ પારેખ દ્વારા) પોરબંદર તા. ૧ : ગાંધી જયંતીની પૂર્વ સંધ્યાએ રાજ્યના મુખ્યમંત્રી ભૂપેન્દ્રભાઇ પટેલ પોરબંદર આવી રહ્યા છે. મુખ્યમંત્રી ભૂપેન્દ્રભાઇ આવતીકાલે ગાંધી જયંતીએ સવારે કીર્તિ મંદિરે પૂ. ગાંધીજીને પુષ્પાંજલી કરશે અને ત્યારપછી કીર્તિ મંદિરમાં યોજાનાર સર્વધર્મ પ્રાર્થના સભામાં હાજર રહેશે.

ગાંધી જયંતી અવસરે મુખ્યમંત્રી ભૂપેન્દ્રભાઇ પટેલના હસ્તે સવારે સ્વચ્છ ભારત મીશન હેઠળના સફાઇ અભિયાનને લીલીઝંડી આપી આગળ વધારશે. નગરપાલિકા તથા જરૂરીયાતમંદો માટે બનાવાયેલા ચિલ્ડ્રન હોમના નવનિર્મિત બિલ્ડીંગોના વારાફરતી લોકાર્પણ કરશે.

મુખ્યમંત્રી ભૂપેન્દ્રભાઇ ગાંધી જયંતીએ ૧૫૩ બાળકોની રેલીનું કીર્તિ મંદિરથી પ્રસ્થાન કરાવશે. ગાંધી જન્મસ્થળ કીર્તિ મંદિરની મુલાકાતે દરરોજ હજારો પ્રવાસીઓ આવે છે તે ધ્યાને રાખીને ફાયબરના ગાંધીજીની પ્રતિકૃતિ સાથે તૈયાર કરેલ પ્રવાસીઓ માટેના સેલ્ફી પોઇન્ટનું મુખ્યમંત્રીના હસ્તે લોકાર્પણ કરાશે.