Gujarati News

જુનાગઢ, તા.૧૪  :જુનાગઢના માળિયા હાટીનામાં ૫૭ વર્ષીય એક જ્વેલર્સને ૨૦ વર્ષ જૂની પૂર્વ પ્રેમિકા સાથે ફરીથી પ્રેમ સંબંધ શરૂ કરવો ભારે પડી ગયો હતો. પૂર્વ પ્રેમિકાએ ૩ મહિના પહેલાં પ્રૌઢનો સંપર્ક કર્યો હતો, અને મીઠી વાતો કરીને પાછો જૂનો પ્રેમ યાદ કરાવ્યો હતો. આ વચ્ચે જ પૂર્વ પ્રેમિકાએ પ્રૌઢને રાત્રીના સમયે પોતાના ઘરે બોલાવ્યા હતા. પ્રૌઢ મહિલા સાથે ઘરમાં હતા, ત્યારે જ બે યુવકો ત્યાં પહોંચ્યા હતા. અને ત્યાં જ પ્રેમિકાએ પોતાના કપડા કાઢી લીધા હતા. જે બાદ બંને યુવકોએ પ્રૌઢનો વિડીયો બનાવી દીધો હતો અને દુષ્કર્મની ફરિયાદમાં ફીટ કરી દેવાની ધમકી આપીને પાંચ લાખ રૂપિયાની માગ કરી હતી. જો કે, આ મામલે બ્લેકમેઈલ કરાતાં પ્રૌઢે પોલીસ ફરિયાદ નોંધાવી હતી.

કેશોદ પોલીસે જણાવ્યું કે, જુનાગઢ જિલ્લાના માળિયા હાટીના ગામના રહેવાસી પ્રદીપ પાલાએ ૪૨ વર્ષીય જ્યોતિ લોહાણા, સિકંદર અને ઈમ્તિયાઝ સામે ફરિયાદ નોંધાવી છે. પ્રદીપ પાલા માળિયા હાટીના ગામમાં જ્વેલરીની દુકાન ધરાવે છે અને તેમનો પરિવાર અમદાવાદમાં રહે છે. પણ લોકડાઉન બાદ તે ગામડે પરત ફર્યાં હતા.

પોલીસે જણાવ્યું કે, ૨૦ વર્ષ અગાઉ પ્રદીપ પાલા પોતાની પાડોશી જ્યોતિ સાથે રિલેશનશીપમાં હતા. ઘરની બાજુમાં રહેતી જ્યોતિ જ્યારે પાણી ભરવા માટે ઘરે આવતી ત્યારે તેમની આંખો મળી ગઈ હતી અને પ્રેમ પાંગર્યો હતો. આ સમયે પ્રદીપના લગ્ન થઈ ગયા હતા. જો કે, જ્યોતિ સિંગલ હતી. પણ બાદમાં જ્યોતિના લગ્ન થઈ ગયા હતા અને તે કેશોદ જતી રહી હતી. અને આ સાથે જ તેઓના પ્રેમ સંબંધનો અંત આવ્યો હતો. પણ ૩ મહિના પહેલાં જ જ્યોતિએ ફરી એકવાર પ્રદીપ પાલાને ફોન કર્યો હતો અને કહ્યું હતું કે, ફેસબુક પરથી તમારો નંબર મળ્યો છે. અને આ સાથે જ બંને વચ્ચે ફોન પર પ્રેમની વાતો શરૂ થઈ હતી.

આ ઉપરાંત પોલીસે જણાવ્યું કે, જ્યોતિ પ્રદીપને સતત ઘરે આવવા માટે કહેતી હતી, પણ પ્રદીપ પાલા તેને ના પાડતા હતા. પણ સતત દબાણને કારણે અને કેશોદમાં કામ અર્થે જવાનું હોવાથી પ્રદીપ પાલાએ જ્યોતિને મંગળવારે તેના ઘરે મળવાનું કહ્યું હતું. પ્રદીપ જ્યોતિને મળવા માટે કેશોદના પલ્લવીનગર પહોંચ્યા હતા. ઘરની પાસે જ્યોતિ પ્રદીપને લેવા માટે ઉભી રહી હતી અને બાદમાં તેમને પોતાના ઘરે લઈ ગઈ હતી.

જ્યોતિ અને પ્રદીપે ઘરમાં બેઠા હતા, ત્યાં જ થોડા સમય બાદ સિકંદર અને ઈમ્તિયાઝ ઘરની અંદર ઘૂસી આવ્યા હતા. અને પ્રદીપભાઈને ગાળો બોલીને કહ્યું કે, તમે મારી સાથે શું કરી રહ્યા છો. અને આ સાથે પ્રદીપભાઈને માર મારવા લાગ્યા હતા. આ વચ્ચે જ્યોતિએ પોતાનો બ્લાઉઝ કાઢીને પ્રદીપ સાથે ઉભી રહી ગઈ હતી. અને તેનો વિડીયો બંને આરોપીએ ઉતારી દીધો હતો. વિડીયો ઉતારી લીધા બાદ જ્યોતિએ પ્રદીપભાઈને કહ્યું હતું કે, હું તમારી સામે દુષ્કર્મની ફરિયાદ નોંધાવવાની છું. આ ઉપરાંત સિકંદર અને ઈબ્રાહિમે પણ પાંચ લાખ રૂપિયા આપો નહીંતર દુષ્કર્મના કેસમાં ફીટ કરી દેવાની ધમકી આપી હતી. જો કે, પ્રદીપભાઈએ આટલાં બધા પૈસા ન હોવાનું જણાવ્યું હતું. જેથી ત્રણેય આરોપીઓએ પોલીસ સ્ટેશન જવા માટે ધમકી આપી હતી. જેમાં પ્રદીપભાઈએ પણ પોલીસ સ્ટેશન જવા માટે હા પાડી હતી. રસ્તામાં પ્રદીપભાઈએ પોતાના કૌટુંબિક ભાઈને ફોન કરીને બોલાવી દીધો હતો. તે આવતાંની સાથે જ જ્યોતિ સિકંદર અને ઈબ્રાહિમ સાથે ફરાર થઈ ગઈ હતી. જો કે, બાદમાં સિકંદર અને ઈબ્રાહિમે પ્રદીપભાઈને ફોન કરીને પૈસા આપવા અથવા વિડીયો વાયરલ કરી જિંદગી બરબાદ કરી દેવાની ધમકી આપી હતી. જે બાદ પ્રદીપભાઈએ ત્રણેય સામે કેશોદ પોલીસમાં ફરિયાદ નોંધાવી હતી.