Gujarati News

(વિનુ જોશી દ્વારા) જૂનાગઢ તા. ૨૭ : જુનાગઢ જિલ્લામાં રાષ્ટ્ર ભક્‍તિ રાષ્ટ્રપ્રેમના માહોલમાં ૭૪મા પ્રજાસત્તાક દિનની જિલ્લાની ઉજવણી વંથલીના સીડ ફાર્મ ગ્રાઉન્‍ડમાં જુનાગઢ જિલ્લાના પ્રભારીમંત્રી અને રાજયના કૃષિ  મંત્રી શ્રી રાઘવજીભાઈ પટેલની ઉપસ્‍થિતિમાં કરવામાં આવી હતી.

કૃષિ મંત્રી શ્રી રાઘવજીભાઈ પટેલે ધ્‍વજ વંદન કરી તિરંગા ને સલામી આપી જિલ્લાના નાગરિકોને સંબોધતા જણાવ્‍યું હતું કે ગુજરાતના ખૂણે ખૂણાના વિકાસ માટે રાજય સરકાર પુરુષાર્થ કરી રહી છે. વડાપ્રધાન શ્રી નરેન્‍દ્ર ભાઈ મોદીના નેતૃત્‍વમાં દેશ પ્રગતિ કરી રહ્યો છે .મૃદુ અને મક્કમ મુખ્‍યમંત્રી શ્રી ભુપેન્‍દ્રભાઈ પટેલના નેતૃત્‍વમાં ગુજરાતના સર્વાંગી વિકાસ સાથે રાજય વિવિધ ક્ષેત્રોમાં વિકાસની નવી ઊંચાઈએ છે. શાંતિ સલામતી અને સુરક્ષા ગુજરાતના વિકાસના પાયામાં છે.

મંત્રી શ્રીએ કૃષિ વિકાસની વાત કરતા કહ્યું કે કૃષિ ક્ષેત્રે ગુજરાતે સિદ્ધિઓ મેળવી છે. ખેડૂતો માટેની અનેક કલ્‍યાણકારી યોજના અમલમાં છે અને તેના લાભો થકી ખેડૂતો ડિજિટલ અને ટેકનોલોજી નો ઉપયોગ કરીને ખેતીમાં આમૂલ પરિવર્તન લાવી રહ્યા છે. મંત્રીએ ખેડૂતોની આવક વધારવા સરકારની વિવિધ યોજનાઓ, પ્રાકૃતિક ખેતી માટે પ્રોત્‍સાહક યોજના સહિત ખેડૂતોની સમૃદ્ધિ માટે ખેડૂતોના હિતકારી નિર્ણયોની વિગતો આપી હતી.

 મંત્રીએ આરજી હકુમતના લડવૈયાઓને યાદ કરી દેશની આઝાદી માટે શહીદ થયેલા વીરોને અંજલી આપી હતી.

કૃષિ મંત્રી શ્રી રાઘવજીભાઈ પટેલે જુનાગઢ જિલ્લામાં કૃષિ, વંથલીના બાગાયતી પાકો, સામાજિક સેવા, આરોગ્‍ય ,શિક્ષણ આઈ સી ડી એસ તેમજ પંચાયત સેવાઓ અને પ્રવાસન ક્ષેત્રે થયેલા વિકાસની ફળશ્રુતિ પણ જણાવી હતી.

જુનાગઢ જિલ્લા વહીવટી તંત્ર દ્વારા નાગરિક સેવાઓ માટે કરવામાં આવેલા નવતર પ્રયોગો અને સુશાસન અંતર્ગત ટીમ દ્વારા થઈ રહેલી નોંધપાત્રક કામગીરીની સરાહના કરી અભિનંદન પાઠવ્‍યા હતા

મંત્રીએ પરેડ નિરીક્ષણ કરી લોકોનું અભિવાદન ઝીલ્‍યું હતું. ખુલી જીપમાં પરેડ નિરીક્ષણ વેળાએ કલેકટર શ્રી રચિત રાજ, એસપી શ્રી રવિ તેજા વાસમ શેટ્ટી સાથે રહ્યાં હતા.

  રાષ્ટ્ર પર્વની ઉજવણી નિમિત્તે વંથલી અને આજુબાજુના વિસ્‍તારની શાળા કોલેજના વિદ્યાર્થીઓએ દેશભક્‍તિ સહિત રંગારંગ  કાર્યક્રમની સાંસ્‍કૃતિક કૃતિ રજૂ કરી હતી. મંત્રીશ્રીના હસ્‍તે રેવન્‍યુ ,પોલીસ, પંચાયત આરોગ્‍ય શિક્ષણ, શ્રેષ્ઠ સરપંચ,અને વિવિધ વિભાગના કર્મચારીઓ અધિકારીઓનું સન્‍માન કરવામાં આવ્‍યું હતું. પોલીસ વિભાગ દ્વારા પ્રસ્‍તુત અલગાજી, માણકી અને અંજલિ નામના અશ્વનો શો આકર્ષિત રહ્યો હતો. મંત્રીના હસ્‍તે વૃક્ષારોપણ કરવામાં આવ્‍યું હતુંઆ પ્રસંગે જૂનાગઢના ધારાસભ્‍ય સંજયભાઈ કોરડીયા, માંગરોળના ધારાસભ્‍ય ભગવાનજીભાઈ કરગઠીયા, કેશોદના ધારાસભ્‍ય દેવાભાઈ માલમ, જિલ્લા પંચાયતના પ્રમુખ શ્રીમતી શાંતાબેન ખટારીયા, કલેકટર રચિત રાજ, એસપી રવિ તેજા વાસમ શેટ્ટી,જિલ્લા ભાજપ પ્રમુખ કિરીટભાઈ પટેલ, દિનેશભાઈ ખટારીયા, ગીરીશભાઈ કોટેચા,  જેઠાભાઇ પાનેરા, અધિક કલેકટર એમ.બી બાભણીયા, આસિસ્‍ટન્‍ટ કલેકટર હનુલ ચૌધરી સહિતના અધિકારીઓ ઉપસ્‍થિત રહ્યા હતા.