Gujarati News

ભુજઃ ફ્રીજ પર રાખેલો ફોન ભૂલથી પડી જવા બદલ પત્નીને જીવતી સળગાવી દેનારાં પતિને ભુજ સેશન્સ કૉર્ટે આજીવન કેદની સજા ફટકારી છે. ભુજની ભાગોળે આવેલા ભારાપર ગામે બે વર્ષ અગાઉ હત્યાનો આ હિચકારો બનાવ બન્યો હતો. છઠ્ઠી મે 2019ના રોજ મરણ જનાર 24 વર્ષિય શરીફાબાઈ પાસે તેના પતિ આમદ ઓસમાણ કુંભારે ફ્રીજ પર પડેલો મોબાઈલ ફોન આપવા જણાવ્યું હતું. શરીફાબાઈ હાથમાં ફોન લઈ આપવા જતી હતી ત્યારે ભૂલથી ફોન નીચે પડી ગયો હતો અને સ્વિચ્ડ ઑફ્ફ થઈ ગયો હતો.

આટલી નજીવી બાબતે આમદે પત્ની જોડે ઝઘડો કરી ઉશ્કેરાઈને તેને કેરોસીન છાંટી જીવતી જલાવી દીધી હતી. ગંભીર હાલતમાં 108 મારફતે ભુજની જી.કે. જનરલ હોસ્પિટલમાં સારવાર માટે ખસેડાયેલી શરીફાબાઈએ પોલીસને જણાવ્યું હતું કે 3 વર્ષના લગ્નજીવનમાં તેનો પતિ અવારનવાર તેની જોડે નાની નાની બાબતે મારકૂટ રહેતો હતો. પરંતુ બે વર્ષની દીકરી ખાતર તે પતિના અત્યાચાર સહન કરતી હતી. સારવાર દરમિયાન શરીફાબાઈએ કાયમ માટે આંખો મીંચી દીધી હતી. ઘટના અંગે માનકૂવા પોલીસે પતિ આમદ સામે IPC 302, 498 (ક), 323, 504 હેઠળ ફરિયાદ નોંધી હતી. આ બનાવમાં અધિક સેશન્સ જજ સી.એમ. પવારે 12 સાહેદો સહિત દસ્તાવેજી પૂરાવા અને બેઉ પક્ષના વકીલોની દલીલો સાંભળી આમદને ગુનેગાર ઠેરવી આજીવન કેદની સજા અને દંડ ફટકાર્યો છે. આ કેસમાં ફરિયાદી પક્ષ વતી એડવોકેટ વિપુલ ડી કનૈયા, હેમાલી ટી પરમાર, સઈદબીન આરબ, મહેશ એસ. સીજુએ હાજર રહીને દલીલો કરી હતી. સરકાર પક્ષે એડવોકેટ દિનેશભાઈ જે. ઠક્કર હાજર રહ્યાં હતા