ઉપરાષ્ટ્રપતિ એમ. વેંકૈયા નાયડુએ સહપરિવાર ભગવાનશ્રી દ્વારકાધીશનું પૂજન - અર્ચન કરી ધન્યતા અનુભવી

ગુજરાતની ભાતીગળ સંસ્કૃતિ અભિવ્યક્ત કરતા આશાપુરા રાસ મંડળી - મકનપુર દ્વારા અને કસ્તુરબાગાંધી વિદ્યાલય - આરંભડા દ્વારા પરંપરાગત સાંસ્કૃતિક કાર્યક્રમ રજૂ કરીને સ્વાગત : સંગઠનના મહિલાઓ દ્વારા કુમકુમ તિલક

(કૌશલ સવજાણી દ્વારા)ખંભાળિયા તા.૬ : ઉપરાષ્ટ્રપતિશ્રી એમ. વેંકૈયા નાયડુ આજે દેવભૂમિ દ્વારકા જિલ્લાની મુલાકાતે પધાર્યા છે. ઉપરાષ્ટ્રપતિ શ્રીએ ધર્મપત્ની શ્રીમતી ઉષાબહેન સાથે સપરિવાર જગત મંદિર ખાતે ભગવાન દ્વારકાધીશના દર્શન કરી ધન્યતા અનુભવી હતી. 

    દ્વારકા મંદિરના પૂજારી દ્વારા શાસ્ત્રોક્ત વિધિથી ઉપરાષ્ટ્રપતિશ્રીને પૂજન - અર્ચન  સાથે સાથે પાદુકા પૂજન પણ કરાવવામાં આવ્યું હતું. તેમજ મંદિરની પ્રદક્ષિણા કરી હતી. બાદમાં દેવકીજીના મંદિરમાં દર્શન કર્યા હતા. 

આ પ્રસંગે ગુજરાતની ભાતીગળ  સંસ્કૃતિ અભિવ્યક્ત કરતા આશાપુરા રાસ મંડળી - મકનપુર દ્વારા અને કસ્તુરબાગાંધી વિદ્યાલય - આરંભડા દ્વારા પરંપરાગત સાંસ્કૃતિક કાર્યક્રમ રજૂ કરી સ્વાગત ગીત રજૂ કરવામાં આવ્યું હતું. તેમજ સંગઠનના મહિલાઓ દ્વારા કુમકુમ તિલક કરી ઉપરાષ્ટ્રપતિશ્રીનું સ્વાગત કરવામાં આવ્યું હતું.

આ તકે શિક્ષણમંત્રી જીતુભાઇ વાઘાણી, ચીફ પ્રોટોકોલ ઓફિસર જ્વલંત ત્રિવેદી, જિલ્લા કલેકટર એમ.એ.પંડ્યા, એસપી નિતેશ પાંડે, ગ્રામગૃહ નિર્માણ બોર્ડના પૂર્વ ચેરમેન મુળુભાઈ બેરા, દ્વારકા નગરપાલિકા પ્રમુખ જ્યોતિબેન સામાણી, સંગઠનના અગ્રણીશ્રીઓ, મયુરભાઈ ગઢવી, શૈલેષભાઇ કણજારીયા, વિજયભાઈ બુજડ સહિતના ઉપસ્થિત રહ્યા હતા.