પૈસાથી લગ્ન કરીને જતી રહેલી મહિલા સામે ફરિયાદ

કન્યાની અછતને લીધે લગ્નમાં છેતરપિંડી વધી : જૂનાગઢના છૂટા છેડા લેનારા યુવક પાસેથી ૧.૮૦ લાખ લઈને ફરી લગ્ન કરાવનારો દલાલ-મહિલા છેતરી ગયા

જુનાગઢ, તા.૧૧ :  ઘણા સમાજમાં કન્યાની અછત થતાં હવે યુવકો રુપિયા આપીને પણ બીજા સમાજની કન્યાઓને પરણી રહ્યા છે. જોકે, આમ કરવા જતા ઘણીવાર લગ્નવાંચ્છુક યુવકો ઠગાઈનો ભોગ પણ બને છે. આવી જ ઠગાઈ જુનાગઢના ટીંબાવાડી વિસ્તારમાં રહેતા એક રત્ન કલાકાર સાથે થઈ છે. ભોગ બનનાર યુવક કમલેશ પાઘડારના છૂટાછેડા થયા બાદ તેને સમાજમાં કોઈ કન્યા નહોતી મળતી. તેના પિતા પણ દીકરા માટે બીજા સમાજમાંથી પણ કન્યાનો મેળ પડી જાય તે માટે પ્રયત્નશીલ હતા. આ દરમિયાન કમલેશના પિતાની મુલાકાત રાજકોટના ભરત રાઠોડ સાથે થઈ હતી.

ભરતે પોતે વિવાહ એજ્યુકેશન એન્ડ ટ્રસ્ટ ચલાવતો હોવાનું જણાવી પોતે કમલેશના લગ્ન કરાવી આપશે, પરંતુ તેના બદલામાં રુપિયા આપવા પડશે તેવી વાત કરી હતી. જેના માટે કમલેશના પિતા તૈયાર થઈ ગયા હતા. વાત નક્કી થયાના થોડા જ દિવસમાં ભરત રાઠોડ કમલેશના ઘરે આવી ટોકન પેટે ૨૫ હજાર લઈ ગયો હતો.

ત્યારબાદ ભરતે કમલેશને છોકરી જોવા માટે પોતાના ઘરે બોલાવી તે વખતે પણ તેની પાસેથી ૧૦ હજાર રુપિયા લીધા હતા. થોડા દિવસ બાદ ભરત અને બીજો એક શખ્સ કમલેશને અંકલેશ્વર પાસે આવેલા નેત્રંગ ગામે લઈ ગયા હતા, અને ત્યાં તેને બે છોકરી બતાવી હતી. જોકે, કમલેશને તે પસંદ નહોતી પડી. ત્યારબાદ વાલીયા તાલુકાના કડવાડી ગામમાં એક કન્યા કમલેશને બતાવાઈ હતી, જે તેને પસંદ પડી હતી. યુવતીએ પોતાનું નામ પારુલ જણાવ્યું હતું. કન્યા પસંદ આવ્યાના બીજા જ દિવસે તેની માતા, કુટુંબી ભાઈ જૂનાગઢ આવ્યા હતા, અને કમલેશના ઘરે ફુલહાર વિધિ કરી દીધી હતી. લગ્ન થઈ જતાં કમલેશના પિતાએ લગ્ન કરાવનારા ભરત રાઠોડને ૧.૪૫ લાખ આપ્યા હતા, અને વહુને પણ ૨૭ હજારના દાગીના ચઢાવ્યા હતા. જોકે, લગ્નના અઠવાડિયા બાદ પારુરે પિયરમાં મામાના દીકરાના લગ્નમાં જવાનું છે તેવી વાત કરતા પારુલ અને તેનો પતિ કમલેશ પારુલના વતનમાં ગયા હતા. પરંતુ પારુલ વતનેથી પરત નહોતી આવી. લગ્નનના સાત દિવસ બાદ પારુલ પાછી ના આવતા કમલેશે લગ્ન કરાવનારા ભરતને વાત કરી હતી, અને તેણે પોતાની બધી જવાબદારી છે તેવી વાત કરી હતી.

આખરે પત્ની પાછી ના આવતા કમલેશને પોતે છેતરાયો હોવાનો અહેસાસ થયો હતો. આ મામલે તેણે ભરત રાઠોડ ઉપરાંત પોતાની સાથે લગ્ન કરનારી પારુલ વસાવા, તેની માતા સહિત છ લોકો સામે પોલીસ ફરિયાદ કરતા હરકતમાં આવેલી પોલીસે વધુ કાર્યવાહી હાથ ધરી છે.