News of Wednesday, 21st July 2021
ભુજની બજારમાં ખરીદી કરતા વૃધ્ધાના ૬૩ હજારના દાગીના અને રોકડની તફડંચી
જૂના દાગીના ભંગાવી નવા બનાવવા જતી વખતે મસાલા ખરીદવા રોકાયા અને અજાણ્યા સ્ત્રી-પુરૂષ કળા કરી ગયા
(વિનોદ ગાલા દ્વારા) ભુજ તા. ૨૧ : ભુજના ૬૦ વર્ષીય વૃધ્ધા પાસેથી દાગીના અને રોકડ સેરવી જવાના કિસ્સાએ ચકચાર સર્જી છે.
હુરબાઈ ફકીરમામદ કુંભાર તેમના ૫ વર્ષના પૌત્ર સાથે ભુજની ભરચક એવી ડાંડા બજારમાં મસાલાની ચક્કી ઉપરથી મસાલા ખરીદી કરવા ઊભા રહ્યા ત્યારે અજાણ્યા સ્ત્રી પુરુષ તેમણે પહેરેલ લાંબા આભાના ખિસ્સામાંથી રૂ. ૫૦ હજારની ચેન તેમ જ ૧૩ હજારની રોકડ સેરવી પલાયન થઈ ગયા હતા.
આ બનાવ બાદ હાંફળા ફાંફળા બની તેમણે પોતાના પુત્રને બોલાવ્યા બાદ પોલીસ ફરિયાદ કરી હતી. તફડંચીનો આ બનાવ મસાલા ચક્કીમાં લગાડેલ સીસી ટીવી કેમેરામાં કેદ થયો છે. જેમાં અજાણ્યા સ્ત્રી પુરૂષ વૃદ્ઘા પાસેથી તફડંચી કરતાં દેખાય છે. ભુજ એ ડિવિઝન પોલીસે વધુ તપાસ હાથ ધરી છે.
(10:53 am IST)