Gujarati News

નવી દિલ્હીઃ તા.૧૮, તાજેતરમાં જ બીસીસીઆઇએ ભારતના બે મહાન ખેલાડીઓને મોટી જવાબદારીઓ સોંપી છે.  રાહુલ દ્રવિડને ટીમ ઈન્ડિયાનો મુખ્ય કોચ બનાવવામાં આવ્યો છે, જ્યારે દ્રવિડના સ્થાને VVS લક્ષ્મણને નેશનલ ક્રિકેટ એકેડમી (NCA)ના પ્રમુખ તરીકે નિયુકત કરવામાં આવ્યા છે. ફ્રેન્ચાઇઝી સનરાઇઝર્સ હૈદરાબાદ માટે માર્ગદર્શક પદ છોડી દેશે.

  મીડિયાને માહિતી આપતાં, BCCI પ્રમુખ સૌરવ ગાંગુલીએ બુધવારે કહ્યું કે, અમે બંને (દ્રવિડ અને લક્ષ્મણ)ની નિમણૂક કરતાં ખુશ છીએ અને ભારતીય ક્રિકેટ હવે સુરક્ષિત હાથમાં છે. મને ખુશી છે કે બંને તૈયાર છે અને તેઓ ભારતીય ક્રિકેટ માટે આ કરવા માંગે છે.

  આ ઉપરાંત ગાંગુલીએ એ પણ જણાવ્યું કે VVS લક્ષ્મણે NCAમાં નિમણૂક કર્યા બાદ કાવ્યા મારનની માલિકીની IPL ફ્રેન્ચાઇઝી સનરાઇઝર્સ હૈદરાબાદના મેન્ટરનું પદ છોડી દીધું છે. તે જ સમયે, તેણે કોમેન્ટેટર તરીકે તેના તમામ કરાર અને કૉલમ લખવાનું છોડી દીધું છે.

  તેણે કહ્યું કે, તે આગામી ત્રણ વર્ષ માટે હૈદરાબાદથી બેંગ્લોર શિફ્ટ થઈ રહ્યો છે જેથી તે ભારતીય ક્રિકેટની સેવા કરી શકે.  તેની કમાણી ઘટી જશે પરંતુ તેમ છતાં તે તૈયાર છે. તેની પત્ની અને બાળકો પણ શિફ્ટ થશે.તેમના બાળકો હવે બેંગ્લોરમાં અભ્યાસ કરશે અને પરિવાર માટે નવા વાતાવરણમાં એડજસ્ટ થવું એ એક મોટો બદલાવ હશે. જ્યાં સુધી તમે ભારતીય ક્રિકેટને સમર્પિત ન હોવ ત્યાં સુધી તે કરવું સરળ નથી. BCCI પ્રમુખે એમ પણ કહ્યું કે, NCA ચીફ તરીકે લક્ષ્મણના આગમનથી મોટો ફરક પડશે.  કારણ કે તે એક અદભુત માનવી છે અને ભારતીય ક્રિકેટમાં તેનું કદ ઘણું ઊંચું છે.  લક્ષ્મણની પ્રતિબદ્ધતાને કારણે તેમની પસંદગી કરવામાં આવી હતી.  તેમની સાથે કામ કરવું હંમેશા અદભુત હોય છે.ભારતીય ક્રિકેટમાં તેનું કદ ઘણું ઊંચું છે. રાહુલે NCAમાં સિસ્ટમ બનાવી છે અને લક્ષ્મણ તેને ચાલુ રાખશે.