Gujarati News

Gujarati News

News of Tuesday, 22nd November 2022

ICC એ વર્ષ ૨૦૨૪માં યોજાનાર T૨૦ વર્લ્‍ડ કપ માટે ફોર્મેટમાં કર્યા ફેરફારો

૨૦૨૪નો T20 વર્લ્‍ડ કપ વેસ્‍ટ ઈન્‍ડિઝ અને યુનાઈટેડ સ્‍ટેટ્‍સ ઓફ અમેરિકાની યજમાનીમાં રમાવાનો છે અને તેમાં ૨૦ ટીમો ભાગ લેવા જઈ રહી છે : T20 વર્લ્‍ડ કપ ૨૦૨૪ માટે સીધી લાયકાત ધરાવતી ૧૨ ટીમો : વેસ્‍ટ ઈન્‍ડિઝ, યુએસએ, ભારત, ઈંગ્‍લેન્‍ડ, ન્‍યુઝીલેન્‍ડ, પાકિસ્‍તાન, ઓસ્‍ટ્રેલિયા, દક્ષિણ આફ્રિકા, અફઘાનિસ્‍તાન, શ્રીલંકા, નેધરલેન્‍ડ, બાંગ્‍લાદેશ

નવી દિલ્‍હી,તા. ૨૨: T20 વર્લ્‍ડ કપ ૨૦૨૨ પૂરો થવામાં હવે થોડા દિવસો જ રહ્યા છે, પરંતુ ઇન્‍ટરનેશનલ ક્રિકેટ કાઉન્‍સિલએ પહેલાથી જ આગામી T20 વર્લ્‍ડ કપની તૈયારીઓ શરૂ કરી દીધી છે. ICC એ વર્ષ ૨૦૨૪માં યોજાનાર T20 વર્લ્‍ડ કપ માટે ફોર્મેટમાં મોટા ફેરફારો કર્યા છે. ૨૦૨૪નો T20 વર્લ્‍ડ કપ વેસ્‍ટ ઈન્‍ડિઝ અને યુનાઈટેડ સ્‍ટેટ્‍સ ઓફ અમેરિકાની યજમાનીમાં રમાવાનો છે અને તેમાં ૨૦ ટીમો ભાગ લેવા જઈ રહી છે.

૨૦ ટીમોની ટુર્નામેન્‍ટ કુલ નોકઆઉટ સહિત ત્રણ તબક્કામાં રમાશે. તમામ ટીમો ૨૦ ટીમોને ૪-૪ના કુલ ૫ ગ્રુપમાં વહેંચવામાં આવશે. દરેક ગ્રુપની ટોપ ૨ ટીમ સુપર-૮માં પ્રવેશ કરશે. આ પછી તમામ આઠ ટીમોને ૪-૪ના ૨ ગ્રૂપમાં વહેંચવામાં આવશે. સુપર-૮ તબક્કામાં બંને જૂથમાંથી ટોચની બે ટીમો સેમિફાઇનલમાં પ્રવેશ કરશે. બે ટીમો બે સેમી ફાઈનલ મેચ દ્વારા ફાઇનલમાં પ્રવેશ કરશે. એટલે કે આગામી ટી૨૦ વર્લ્‍ડ કપ તાજેતરના ટી૨૦ વર્લ્‍ડ કપથી ઘણો અલગ હશે અને તેમાં કોઈ ક્‍વોલિફાઈંગ રાઉન્‍ડ નહીં હોય અને સુપર-૧૨ સ્‍ટેજ નહીં હોય. તાજેતરના T20 વર્લ્‍ડ કપમાં કુલ ૧૬ ટીમોએ ભાગ લીધો હતો, જેમાં ૮ ટીમોને સુપર-૧૨ સ્‍ટેજ માટે સીધી એન્‍ટ્રી મળી હતી. તે જ સમયે, ૪ ચાર ટીમોએ ક્‍વોલિફાઇંગ રાઉન્‍ડ દ્વારા સુપર-૧૨માં જગ્‍યા બનાવી છે.

વેસ્‍ટ ઈન્‍ડિઝ અને યુનાઈટેડ સ્‍ટેટ્‍સ ઓફ અમેરિકા યજમાન તરીકે આગામી વ્‍૨૦ વર્લ્‍ડ કપ માટે સીધા જ ક્‍વોલિફાય થયા છે. તે જ સમયે, T20 વર્લ્‍ડ કપના સુપર-૧૨ તબક્કાની ટોચની ૮ ટીમોને આગામી સિઝન માટે સીધી એન્‍ટ્રી મળી ગઈ છે. આ ટીમોમાં ન્‍યુઝીલેન્‍ડ, ઈંગ્‍લેન્‍ડ, ઓસ્‍ટ્રેલિયા, શ્રીલંકા, ભારત, પાકિસ્‍તાન, દક્ષિણ આફ્રિકા અને નેધરલેન્‍ડનો સમાવેશ થાય છે. આ સાથે ICC રેન્‍કિંગ (૧૪ નવેમ્‍બર)ના આધારે અફઘાનિસ્‍તાન અને બાંગ્‍લાદેશને પણ આ T20 વર્લ્‍ડ કપ માટે સીધી એન્‍ટ્રી મળી છે.

એટલે કે ૨૦ માંથી ૧૨ ટીમો નક્કી થઈ ગઈ છે અને આઠ સ્‍પોટ બાકી છે. T20 વર્લ્‍ડ કપ ૨૦૨૪ માટે બાકીની ૮ ટીમો પ્રાદેશિક લાયકાતના આધારે નક્કી કરવામાં આવશે. આ ક્‍વોલિફિકેશનમાં, આફ્રિકા, એશિયા અને યુરોપમાં બે-બે ક્‍વોલિફિકેશન સ્‍પોટ છે, જયારે અમેરિકા અને પૂર્વ એશિયા પેસિફિક પાસે ૧-૧ સ્‍લોટ છે. ઝિમ્‍બાબ્‍વે, નામિબિયા, સ્‍કોટલેન્‍ડ, આયર્લેન્‍ડ જેવી ટીમો પાસે પ્રાદેશિક ક્‍વોલિફિકેશન દ્વારા સ્‍થાન બનાવવાની સુવર્ણ તક હશે.

 

(11:12 am IST)