‘જીગરા' ટ્રેલર ....ભાઈને બચાવવા જમીન-આકાશ એક કરતી જોવા મળશે આલિયા
૧૧ ઓક્ટોબરે સિનેમાઘરોમાં રિલીઝ થવાની છેઃ ‘જીગરા' રાજકુમાર રાવ અને તૃપ્તિ ડિમરી અભિનીત ફિલ્મ ‘વિકી વિદ્યા કા વો વાલા વીડિયો' સાથે ટકરાશે
મુંબઇ,તા. ૨૭: આલિયા ભટ્ટ અને વેદાંગ રૈનાની ફિલ્મ ‘જીગરા'ની ખૂબ જ ચર્ચા છે. ધર્મા પ્રોડક્શન્સે આગામી ફિલ્મના પ્રમોશનમાં કોઈ કસર છોડી નથી. તેના પોસ્ટર હોય કે ગીત રિલીઝ, નિર્માતાઓએ ‘જીગરા'માટે ખૂબ જ આતુરતા ઉભી કરી છે.ત્યારે હવે ધર્માએ આખરે ફિલ્મનું ઓફિશિયલ ટ્રેલર શેર કર્યું છે. આલિયા અને વેદાંગ ફિલ્મમાં ભાઈ અને બહેનની ભૂમિકા ભજવતા જોવા મળે છે અને ‘ગલી બોયઝ'અભિનેત્રી ‘જીગરા'ના ટ્રેલરમાં તેના નાના ભાઈની સુરક્ષા કરતી જોવા મળે છે.
‘જીગરા'નું ટ્રેલર આલિયા ભટ્ટના ફોનથી શરૂ થાય છે. તે ફોન કોલ દ્વારા તેના ભાઈને પકડવાનો પ્રયાસ કરે છે. જો કે, જયારે તેને જેલની સજા થાય છે ત્યારે તેની સ્થિતિ વધુ ખરાબ થઈ જાય છે. બાદમાં કોરિયન જેલમાં ઘૂસવા અને તેના ભાઈને પરત લાવવા માટે લશ્કરી તથા શારીરિક રીતે તાલીમ આલિયા લે છે. તે પોતાના ભાઈને બચાવવા માટે અથાક પ્રયાસો કરતી દેખાઈ છે. ટ્રેલરના અંતે એક સંવાદ સાંભળવા મળે છે, જેમાં આલિયા કહે છે ‘મેંને કભી નહીં કહા મેં સહી ઈન્સાન હું, મેં સિર્ફ અંકુર કી બહેન હું'
ફિલ્મની સ્ટારકાસ્ટ ફિલ્મના પ્રમોશનમાં લાગી ગઈ છે. આલિયા ભટ્ટ તાજેતરમાં જ પોતાની ફિલ્મના પ્રમોશન માટે વેદાંગ રૈના અને નિર્માતા કરણ જોહર સાથે ધ ગ્રેટ ઈન્ડિયન કપિલ શોમાં જોવા મળી હતી. આ સિવાય તે ‘દેવરાઃ પાર્ટ ૧' અને ‘જીગરા'ની રિલીઝ પર જુનિયર એનટીઆર સાથે વાત કરતી જોવા મળી હતી.
આલિયા ભટ્ટે ‘જીગરા'જેવી ફિલ્મ સાઈન કરવા વિશે વાત કરી હતી. આલિયાએ કહ્યું, ‘જ્યારે જીગરા મારી પાસે આવી ત્યારે હું રાહાને લઈ ખૂબ જ પ્રોટેક્ટિવ ફીલ કરતી હતી. મને લાગ્યું કે મારે તેને સુરક્ષિત રાખવા માટે બધું જ કરવું પડશે અને જીગરાની થીમ કંઈક એવી જ છે, જયાં હું મારા પાત્ર માટે બાળકથી ઓછો ન હોય તેવા મારા ભાઈને બચાવવાનો પ્રયાસ કરી રહી છું.'
વાસન બાલા દ્વારા દિગ્દર્શિત ‘જીગરા'માં વેદાંગ રૈના પણ છે અને તે ૧૧ ઓક્ટોબરે સિનેમાઘરોમાં રિલીઝ થવાની છે. આ ફિલ્મ આલિયાના પાત્રની સફર દર્શાવે છે, જે તેના ભાઈને જેલમાંથી બહાર કાઢવા માટે અસાધારણ પગલાં લે છે. તેનું નિર્માણ કરણ જોહર, અપૂર્વ મહેતા, આલિયા ભટ્ટ, શાહીન ભટ્ટ અને સૌમેન મિશ્રા દ્વારા કરવામાં આવ્યું છે.‘જીગરા' રાજકુમાર રાવ અને તૃપ્તિ ડિમરી અભિનીત ફિલ્મ ‘વિકી વિદ્યા કા વો વાલા વીડિયો' સાથે ટકરાશે.