મુંબઈ: બિગ બોસ OTT 1 વિજેતા પ્રખ્યાત યુટ્યુબર એલ્વિશ યાદવ અને કોમેડિયન ભારતી સિંહને દિલ્હી પોલીસ દ્વારા છેતરપિંડીયુક્ત એપ આધારિત કૌભાંડ કેસમાં પૂછપરછ માટે સમન્સ મોકલવામાં આવ્યા છે. આ બે ઉપરાંત પોલીસ અન્ય ત્રણ લોકોની પણ પૂછપરછ કરશે. પોલીસને 500 થી વધુ ફરિયાદો મળી છે જેમાં આક્ષેપ કરવામાં આવ્યો છે કે કેટલાક સોશિયલ મીડિયા પ્રભાવકો અને યુટ્યુબર્સે હિબોક્સ નામની મોબાઇલ એપ્લિકેશનનો પ્રચાર કર્યો અને લોકોને તેના દ્વારા રોકાણ કરવા પ્રેરિત કર્યા.આ કૌભાંડના મુખ્ય આરોપી ચેન્નાઈ નિવાસી શિવરામની ધરપકડ કરવામાં આવી છે. ડેપ્યુટી કમિશનર ઓફ પોલીસ હેમંત તિવારીના જણાવ્યા અનુસાર, હિબોક્સ એક સુનિયોજિત કૌભાંડનો ભાગ હતો. આરોપીઓએ એપ દ્વારા દરરોજ 1 થી 5 ટકા અને મહિનામાં 30 થી 90 ટકા વળતરની ખાતરી આપી હતી. ફેબ્રુઆરી 2024માં લોન્ચ થયા બાદ 30,000થી વધુ લોકોએ તેમાં રોકાણ કર્યું હતું. જો કે, જુલાઇથી એપ્લિકેશને વિવિધ તકનીકી અને કાયદાકીય સમસ્યાઓને ટાંકીને ચૂકવણી બંધ કરી દીધી હતી.પોલીસે માસ્ટરમાઇન્ડ શિવરામના ચાર અલગ-અલગ બેંક ખાતામાંથી 18 કરોડ રૂપિયા જપ્ત કર્યા છે. નોંધનીય છે કે ભારતી અને તેના પતિ હર્ષ લિમ્બાચીયાની વર્ષ 2020માં નાર્કોટિક્સ કંટ્રોલ બ્યુરો (NCB) દ્વારા ધરપકડ કરવામાં આવી હતી. ત્યારબાદ તેના ઘરમાંથી 86.5 ગ્રામ ગાંજો મળી આવ્યો હતો. બીજી તરફ, એલ્વિશ દરરોજ વિવાદોમાં ફસાયેલો રહે છે. તાજેતરમાં, એન્ફોર્સમેન્ટ ડિરેક્ટોરેટ (ED) એ એલ્વિશની કરોડો રૂપિયાની સંપત્તિ જપ્ત કરી હતી.