મુંબઈ તા.૧૯ :પીઢ હિન્દી અને બંગાળી સિનેમાની અભિનેત્રી મુનમુન સેનના પતિ અને બોલિવૂડ અભિનેત્રી રાઈમા અને રિયા સેનના પિતા ભરત દેવ વર્માનું મંગળવારે (19 નવેમ્બર) અવસાન થયું છે. આ સમયે સમગ્ર પરિવાર આઘાતમાં છે. મળતી માહિતી મુજબ ભરત દેવ વર્માની અચાનક તબિયત લથડી હતી, જે બાદ એમ્બ્યુલન્સ બોલાવવામાં આવી હતી. પરંતુ એમ્બ્યુલન્સ ઘરે પહોંચે તે પહેલા જ તેમણે દુનિયાને અલવિદા કહી દીધું હતું.

રાયમા-રિયા સેનના પિતાનું અવસાન

રાયમા અને રિયા સેનના પિતાએ 83 વર્ષની વયે કોલકાતામાં અંતિમ શ્વાસ લીધા છે. જ્યારે ભરત દેવ વર્માની તબિયત બગડી ત્યારે તેઓ ઘરે હતા. આવી સ્થિતિમાં પરિવારજનોએ એમ્બ્યુલન્સ બોલાવી, પરંતુ ત્યાં સુધીમાં ઘણું મોડું થઈ ચૂક્યું હતું. તેણે દુનિયાને અલવિદા કહી દીધું છે. 

મમતા બેનરજીએ શોક વ્યક્ત કર્યો

પશ્ચિમ બંગાળના મુખ્યમંત્રી મમતા બેનરજીએ સોશિયલ મીડિયા પર પોસ્ટ કરીને ભરત દેવ વર્માના નિધન પર શોક વ્યક્ત કર્યો છે. રાયમા સેન હાલમાં જયપુરમાં શૂટિંગમાં વ્યસ્ત છે. પરંતુ તેના પિતાના નિધનના સમાચાર સાંભળતા જ તે કોલકાતા જવા રવાના થઈ ગઈ છે.

રાજવી પરિવારના હતા

ભરત દેવ વર્મા ત્રિપુરાના રાજવી પરિવારના હતા. તેમની માતા ઇલા દેવી કૂચ બિહારની રાજકુમારી અને જયપુરની રાણી ગાયત્રી દેવીની મોટી બહેન હતી. ભરત દેવ વર્માની દાદી ઈન્દિરા વડોદરાના મહારાજા સેરજી રાવ ગાયકવાડ ત્રીજાની એકમાત્ર પુત્રી હતી.