કહાની, ક્વીન અને મુજસે શાદી કરોગીની સ્ટોરી આગળ વધશે
‘કહાની ૩'માં વિદ્યા બાલન અને ‘ક્વીન ૨'માં કંગના યથાવત રહેશે, ‘મુજસે શાદી કરોગી ૨'માં નવી કાસ્ટ લેવા કવાયત
મુંબઈ,તા.૩૦: હિન્દી ફિલ્મ ઈન્ડસ્ટ્રીઝમાં ફ્રેન્ચાઈઝીનો ટ્રેન્ડ પૂરબહારમાં ખીલેલો છે. ઓડિયન્સને પસંદ આવેલી ફિલ્મોના પ્રમોશનમાં ઓછી મહેનત કરવી પડે છે અને પહેલી ફિલ્મ જોનારું ઓડિયન્સ સરળતાથી સીક્વલ માટે ટિકિટ ખરીદવા તૈયાર થાય છે. આવતી કાલે ‘રેડ ૨' આવી રહી છે અને ત્યારબાદ પણ સંખ્યાબંધ હિટ ફિલ્મોની સીક્વલ આવવાની છે. આ યાદીમાં હવે ‘કહાની', ‘ક્વીન' અને ‘મુજસે શાદી કરોગી'નું નામ ઉમેરાયું છે. આ ત્રણેય ફિલ્મોમાં જૂની સ્ટોરીને આગળ વધારવામાં આવશે.
અક્ષય કુમારની ‘કેસરી ૨' ધીમી ગતિએ બોક્સઓફિસ પર પકડ જમાવી રહી છે. ‘રેડ ૨'ને ઓડિયન્સ વધાવી લેશે તેવું મનાય છે. આગામી સમયમાં ‘હાઉસફુલ ૫' અને ‘સિતારે જમીન પર' આવી રહી છે. આમ, ફિલ્મ ઈન્ડસ્ટ્રીને લોક-યિ બનેલા ટાઈટલનો લાભ લેવાનું ગમી રહ્યું છે. સીક્લવના આ સદાબહાર ટ્રેન્ડમાં ઝંપલાવતા ડાયરેક્ટર સુજોય ઘોષ ‘કહાની ૩'ની સ્ક્રિપ્ટ તૈયાર કરી રહ્યા છે. તેઓ અગાઉની ફિલ્મની સ્ટોરીને આગળ વધારવાની સાથે વિદ્યા બાલનને પણ ફિલ્મમાં યથાવત રાખવા માગે છે. વિદ્યા બાલન અને સુજોય ઘોષ વચ્ચે આ ફિલ્મ માટે સંમતિ સધાઈ ગઈ છે અને સુજોય ઘોષ તરફથી સંપૂર્ણ સ્ક્રિનપ્લે મળે તેની રાહ દીપિકા જોઈ રહી છે.
ડાયરેક્ટર વિકાસ બહેલે કંગના રણોતને લીડ રોલમાં રાખીને ‘ક્વીન'ની સીક્વલ બનાવવા તૈયારી શરૂ કરી છે. વિકાસે સ્ક્રિપ્ટ પસંદ કરી લીધી હોવાનું કહેવાય છે, જો કે ફિલ્મના ટાઈટલ અંગે કાનૂની સમસ્યા છે. ‘ક્વીન'ના પ્રોડ્યુસર્સ હવે અલગ થઈ ગયા છે અને તેથી ટાઈટલ મળવાનું અઘરું છે. ટાઈટલ ના મળે તો પણ કંગનાને લીડ રોલમાં યથાવત રાખીને વિકાસ બહેલે ફિલ્મ બનાવવાનું વિચાર્યું છે. કંગના સાથે તેમણે સ્ક્રિપ્ટ બાબતે ચર્ચા કરેલી છે અને કંગના તેનાથી ખુશ છે.
ડેવિડ ધવનની આઈકોનિક કોમેડી ‘મુજસે શાદી કરોગી'માં સલમાન ખાન, અક્ષય કુમાર, પ્રિયંકા ચોપરા લીડ રોલમાં હતા. પ્રોડ્યુસર સાજિદ નડિયાદવાલા ‘મુજસે શાદી કરોગી ૨' બનાવવા માગે છે. તેઓ સ્ક્રિપ્ટને આખરી ઓપ આપી રહ્યા છે. જો કે જૂની કાસ્ટને રીપિટ કરવાના બદલે નવી પેઢીના સ્ટાર્સ સાથે ફિલ્મ બનાવવાની તેમની ઈચ્છા છે. સ્ક્રિપ્ટ પસંદ આવશે તો સાજિદ આગળ વધશે. સ્ક્રિપ્ટ યોગ્ય નહીં જણાય તો તેઓ સીક્વલ બનાવવાનો વિચાર પડતો મૂકશે.