મુંબઇ તા.૨: અજય દેવગને ‘રેડ ૨'માં બાહોશ અને ઈમાનદાર IRS અધિકારી અમય પટનાઈકનો રોલ કર્યો છે. ભ્રષ્ટાચાર સામે ઝઝૂમનારા અધિકારીના સંઘર્ષને રજૂ કરતી આ ફિલ્‍મ પહેલી મેના રોજ રિલીઝ થઈ છે. ફિલ્‍મ સંદર્ભે ભ્રષ્ટાચારની વાત કરતાં અજય દેવગને કહ્યું હતું કે, સમાજ તરીકે આપણે સમજવું જોઈએ કે, જે અધિકારીઓને આપણે ભ્રષ્ટાચારીમાં ખપાવીએ છીએ, તેઓ આખરે તો આ સમાજનો જ એક ભાગ છે. 

‘રેડ ૨'માં પોતાના કેરેક્‍ટરને અજય દેવગન રોલ મોડેલ માને છે કે કેમ તે અંગે વાત કરતાં તેમણે જણાવ્‍યુ હતું કે, આપણે ભ્રષ્ટાચાર માટે અધિકારીઓને જવાબદાર માનીએ છીએ. જો કે આ અધિકારીઓ પણ ત્‍યાંથી જ આવે છે, જ્‍યાંથી આપણે આવીએ છીએ. તેઓ એ જ સમાજનો ભાગ છે. તેથી કોઈ અધિકારી ભ્રષ્ટ હોવાનો મુદ્દો મહત્ત્વનો નથી, તેઓ આપણામાંથી જ એક છે. આમ જોઈએ તો આપણે જ ભ્રષ્ટ છીએ. 

અજયે વધુમાં કહ્યુ હતું કે, સમાજમાં ભ્રષ્ટાચારનો સડો એક વાર ઘૂસી જાય તો તે અલગ-અલગ વિભાગોમાં પણ પહોંચે છે. કેટલીક જગ્‍યાએ ભ્રષ્ટાચાર હોય છે, જ્‍યારે કેટલાક સ્‍થળે ભ્રષ્ટાચાર નથી હોતો. કેટલાક લોકો સારા હોય છે અને કેટલાક ખરાબ હોય છે. સમાજની સ્‍થિતિ જેવી હોય છે, તેવી જ સ્‍થિતિ ડિપાર્ટમેન્‍ટની થાય છે. કારણ કે તેઓ આપણામાંથી જ એક છે. 

‘રેડ ૨'માં ઈનકમ ટેક્‍સ અધિકારી અમય પટનાઈકનો મુકાબલો ભ્રષ્ટ રાજકારણી સાથે થાય છે. કાયદાની મર્યાદામાં રહીને લડત આપનારા અધિકારીનાં પત્‍નીનો રોલ વાણી કપૂરે કર્યો છે. સૌરભ શુક્‍લાનો આ ફિલ્‍મમાં સ્‍પેશિયલ રોલ છે. ફિલ્‍મને રિલીઝના પહેલા દિવસે ઓડિયન્‍સે સારો રિસ્‍પોન્‍સ આપ્‍યો છે.