નવી દિલ્હી:  બોલિવૂડ ઇન્ડસ્ટ્રીમાં ફિલ્મોની સફળતાની વાર્તાઓ ક્યારેક આશ્ચર્યજનક હોય છે, અને અભિનેતા અક્ષય કુમારની ૨૦૧૭માં રિલીઝ થયેલી ફિલ્મ 'ટોયલેટ: એક પ્રેમ કથા' આવી જ એક અસામાન્ય ગાથા છે. તમને જાણીને આશ્ચર્ય થશે કે બોક્સ ઓફિસ પર ₹૩૦૦ કરોડથી વધુનો વ્યાપાર કરનાર અને ૧૧ એવોર્ડ જીતનાર આ ફિલ્મને શરૂઆતમાં ઇન્ડસ્ટ્રીના કોઈ મોટા અભિનેતા સ્વીકારવા તૈયાર નહોતા!

સાડા ચાર વર્ષ સુધી અભિનેતાઓનો અસ્વીકાર!
ખુદ અક્ષય કુમારે એક ઇન્ટરવ્યુમાં આ રહસ્ય પરથી પડદો ઉઠાવ્યો હતો. તેમણે કહ્યું હતું કે આ ફિલ્મોની સ્ક્રિપ્ટ ઇન્ડસ્ટ્રીમાં લગભગ સાડા ચાર વર્ષ સુધી ફરતી રહી, પરંતુ ઘણા મોટા હીરોએ તેમાં કામ કરવાની ના પાડી દીધી હતી.

અક્ષય કુમારે જણાવ્યું, "મને આ ફિલ્મની વાર્તા ખૂબ જ ગમી. મેં તો હાથ જોડીને નિર્માતા નીરજ પાંડે પાસેથી આ ફિલ્મ માગી અને કહ્યું કે મારે આમાં કામ કરવું છે."

રિયલ સ્ટોરી પર આધારિત, સોશિયલ મેસેજ
ફિલ્મ 'ટૉયલેટ: એક પ્રેમ કથા' (શરૂઆતમાં નામ 'સંડાસ: એક પ્રેમ કથા' હતું) ગ્રામીણ વિસ્તારોમાં શૌચાલયની અછત અને તેના કારણે મહિલાઓને પડતી મુશ્કેલીઓ પર આધારિત એક સાચી વાર્તા પર બની હતી. ફિલ્મમાં અક્ષય કુમાર (કેશવ) અને ભૂમિ પેડનેકર (જયા)ની જોડી હતી, જ્યાં જયા લગ્ન પછી ઘરમાં શૌચાલય ન હોવાથી કેશવને છોડી દે છે, જેનાથી કેશવ આખા ગામમાં શૌચાલય બનાવવા માટે અભિયાન શરૂ કરે છે.

કમાણી અને સન્માન

બજેટ: માત્ર ₹૧૮ કરોડ

ભારતમાં ગ્રોસ કલેક્શન: ₹૧૮૬.૪૨ કરોડ

વર્લ્ડવાઇડ કમાણી: ₹૩૧૬.૯૭ કરોડ

એવોર્ડ્સ: ફિલ્મે કુલ ૧૧ એવોર્ડ જીત્યા.

આ ફિલ્મ સાબિત કરે છે કે જો વાર્તામાં દમ હોય અને અભિનેતા દિલથી કામ કરે, તો બોક્સ ઓફિસ પર માત્ર કમાણી જ નહીં, પણ સન્માન પણ મળે છે. આ ફિલ્મ હાલમાં જી૫ પર ઉપલબ્ધ છે અને IMDb પર ૭.૨ રેટિંગ ધરાવે છે.