નવી દિલ્હી : તારક મહેતા કા ઉલ્ટા ચશ્મા' સિરિયલની લોકપ્રિય અભિનેત્રી મુનમુન દત્તા (બબીતા જી) હાલમાં તેના ચાહકો તરફથી મળેલા અપાર પ્રેમથી અભિભૂત છે. મુનમુન દત્તા તેના 'વર્કિંગ બર્થ-ડે'ની ઉજવણી માટે પહેલીવાર પટના શહેર પહોંચી હતી, જ્યાં હજારો લોકોએ તેમને જે ઉષ્માભર્યો આવકાર આપ્યો, તેનાથી અભિનેત્રીની આંખો ભીની થઈ ગઈ હતી.

મુનમુન દત્તાએ તેના સોશિયલ મીડિયા પર એક વીડિયો શેર કર્યો છે, જેમાં તે એક ઈવેન્ટમાં સ્ટેજ પર જોવા મળી રહી છે. વીડિયોમાં, તે સફેદ ડ્રેસ અને મોતીના સુંદર દાગીનામાં ગ્લેમરસ લાગી રહી છે. સ્ટેજ પર મુનમુન દત્તા ડાન્સ કરીને ફેન્સ સાથે મસ્તી કરી રહી છે, ત્યારે નીચે હાજર હજારો લોકો જોરદાર નારા લગાવીને અને તાળીઓ પાડીને "બબીતા જી" પર પ્રેમનો વરસાદ વરસાવી રહ્યા છે.

પહેલી મુલાકાતમાં જ ફેન્સનો ઉત્સાહ જોઈ ભાવુક થયા મુનમુન
ચાહકોના આ અદ્ભુત ઉત્સાહથી અભિભૂત થઈને મુનમુન દત્તાએ કેપ્શનમાં પોતાની લાગણી વ્યક્ત કરી: "પટનામાં કાર્યકારી જન્મદિવસ... આ શહેરમાં આ મારો પહેલો સમય છે અને મને બતાવેલા ઉત્સાહ અને પ્રેમથી હું અભિભૂત છું... ખૂબ આભારી છું."

અભિનેત્રીએ કહ્યું કે પટનામાં ફેન્સ તરફથી મળેલો આ અપાર પ્રેમ તેના માટે જન્મદિવસની સૌથી મોટી ભેટ છે. જોકે, અભિનેત્રીએ પોતાનો ખાનગી જન્મદિવસ ખૂબ જ સાદગીપૂર્ણ રીતે પોતાની માતા સાથે કેક કાપીને ઉજવ્યો હતો, પરંતુ પટનામાં મળેલી જાહેર ઉજવણીની ભવ્યતા કંઈક અલગ જ હતી.

મુનમુન દત્તા ઘણા વર્ષોથી 'તારક મહેતા કા ઉલ્ટા ચશ્મા' સિરિયલમાં કામ કરી રહી છે અને જેઠાલાલ તથા બબીતા જીની જોડી શોમાં સૌથી વધુ લોકપ્રિય છે. આ સિવાય તેણે 'હોલિડે' અને 'મુંબઈ એક્સપ્રેસ' જેવી ફિલ્મોમાં પણ કામ કર્યું છે.