ગોપાલગંજ,તા.૦૩: પ્રતિભાશાળી બોલીવુડ અભિનેતા પંકજ ત્રિપાઠીના માતા શ્રીમતી હેમવંતી દેવીનું શુક્રવારે બિહારના ગોપાલગંજ જિલ્‍લાના તેમના વતન બેલસંદમાં અવસાન થયું. તેમનું ૮૯ વર્ષની વયે તેમના નિવાસસ્‍થાને અવસાન થયું. તેમણે તેમના પરિવારના સભ્‍યોની હાજરીમાં તેમના પથારીમાં શાંતિથી અંતિમ શ્વાસ લીધા.

પરિવારના જણાવ્‍યા મુજબ, હેમવંતી દેવી છેલ્‍લા કેટલાક સમયથી અસ્‍વસ્‍થ ચાલી રહ્યા હતાં. તેમ છતાં, પોતાના પરિવારજનોની હાજરીમાં, પોતાના બેડ પર જ તેમણે અંતિમ શ્વાસ લીધો. આ કઠિન ક્ષણોમાં પુત્ર પંકજ ત્રિપાઠી તેમની માતાની બાજુમાં હાજર હતા.

પંકજ ત્રિપાઠી તે સમયે પોતાની માતા સાથે જ હાજર હતાં. અંતિમ સંસ્‍કાર શનિવારે બેલસંડ ગામમાં પરિવારના સભ્‍યો, સગાસંબંધીઓ અને નજીકના મિત્રોની હાજરીમાં કરવામાં આવ્‍યો. સમગ્ર ત્રિપાઠી પરિવાર આ દુઃખદ ઘટના બાદ શોકમાં ગરકાવ છે.

પરિવાર તરફથી જાહેર કરાયેલા સંદેશમાં જણાવાયું છે કે, ‘‘અમે બધા ખૂબ જ દુઃખમાં છીએ. આપ સૌને વિનંતી કરીએ છીએ કે શ્રીમતી હેમવંતી દેવીની આત્‍માની શાંતિ માટે પ્રાર્થના કરો.'' સાથે જ પરિવારએ મીડિયા અને શુભેચ્‍છકોને વિનમ્ર વિનંતી કરી છે કે આ શોકની ઘડીમાં તેમની પ્રાઇવસીનો સન્‍માન કરે.