મુંબઇ: બોલિવૂડ અભિનેતા કાર્તિક આર્યન શુક્રવારે તેની નાની બહેન કૃતિકા તિવારીનાં લગ્ન થયા બાદ અત્યંત ભાવુક થઈ ગયો છે. કાર્તિકે સોશિયલ મીડિયા પ્લેટફોર્મ પર બહેનના લગ્નની કેટલીક ખાસ અને સુંદર તસવીરો શેર કરી છે, સાથે જ તેણે લાડકી બહેન 'કિકી' માટે એક હૃદયસ્પર્શી ઇમોશનલ નોટ પણ લખી છે. આ પોસ્ટમાં તેણે બહેનને નવા જીવન માટે આશીર્વાદ આપ્યા છે અને તેની પર ખૂબ પ્રેમ વરસાવ્યો છે, જે ભાઈ-બહેનના મજબૂત સંબંધોની ઝલક આપે છે.
કાર્તિકે પોતાની પોસ્ટમાં લખ્યું છે કે, "કેટલાક દિવસ એવા હોય છે જે ચૂપચાપ તમારી દુનિયા બદલી નાખે છે. આજે આવો એક દિવસ હતો. આજે કિકીને દુલ્હન તરીકે જોઈને એવું લાગ્યું જાણે વર્ષોને ક્ષણમાં બદલાતાં જોઈ રહ્યો છું." તેણે જૂની યાદો તાજી કરતાં લખ્યું કે, તે કિકીને પોતાની પાછળ દોડતી નાની બાળકીમાંથી મોટી થઈને એવી દુલ્હન તરીકે જોઈ રહ્યો છે જે આજે આનંદ અને શક્તિ સાથે તેના નવા જીવનમાં પગ મૂકી રહી છે. કાર્તિકે બહેનના મૂલ્યો પર ગર્વ વ્યક્ત કર્યો અને તેઓએ સાથે વિતાવેલાં દરેક હાસ્ય, ઝઘડા, રહસ્યો અને યાદો માટે આભાર માન્યો.
અભિનેતાએ અંતે બહેનને ભાવુક આશીર્વાદ આપતાં કહ્યું કે, "તું નવો અધ્યાય શરૂ કરી રહી છે, પરંતુ તું હંમેશાં મારી નાની બહેન રહેશે. અમારા પરિવારની ધડકન." તેણે ખુશી વ્યક્ત કરી કે કૃતિકાને જીવનમાં એક વાર મળતો ખાસ પ્રેમ મળ્યો છે અને દુઆ કરી કે આ નવી સફર તેને એ બધું આપે જેનું તેણે ક્યારેય સપનું જોયું હોય. કાર્તિક અને તેની બહેન કૃતિકા, જે ડોક્ટર છે, તેમની વચ્ચેનો મજબૂત બોન્ડ ઘણીવાર સોશિયલ મીડિયા પર જોવા મળ્યો છે. આ લગ્ન સમારંભ તેમના પરિવાર માટે ખુશી અને ભાવનાત્મકતાનો સમન્વય લઈને આવ્યો છે.