નવી દિલ્હી, તા.17: ભારતીય સિનેમા માટે આજે ગર્વની ક્ષણ છે. ઈશાન ખટ્ટર, જાહ્નવી કપૂર અને વિશાલ જેઠવા જેવા યુવા કલાકારોની શાનદાર અભિનયથી સજેલી ફિલ્મ 'હોમબાઉન્ડ' હવે સત્તાવાર રીતે 98મા એકેડેમી એવોર્ડ્સ (ઓસ્કાર 2026) માટે શોર્ટલિસ્ટ થઈ ગઈ છે. નીરજ ઘાયવાનના નિર્દેશનમાં બનેલી આ ફિલ્મે સાબિત કરી દીધું છે કે જ્યારે વાર્તામાં દમ હોય, ત્યારે બોક્સ ઓફિસના આંકડા ગૌણ બની જાય છે.

ભાવુક થયા કરણ જોહર

ફિલ્મની આ વૈશ્વિક સફળતા જોઈને નિર્માતા કરણ જોહર અત્યંત ભાવુક થઈ ગયા હતા. ધર્મા પ્રોડક્શન્સે સોશિયલ મીડિયા પર પોતાની ખુશી વ્યક્ત કરતા જણાવ્યું કે, આ માત્ર એક ફિલ્મ નથી પણ વર્ષોની મહેનતનું પરિણામ છે. કરણ જોહરે ઈન્સ્ટાગ્રામ પર આ ઉપલબ્ધિ બદલ સમગ્ર ટીમનો આભાર માન્યો હતો. ઉલ્લેખનીય છે કે આ ફિલ્મે અગાઉ કાન્સ ફિલ્મ ફેસ્ટિવલમાં પણ 9 મિનિટ સુધી સતત તાળીઓના ગડગડાટ સાથે સન્માન મેળવ્યું હતું.

વિશ્વની શ્રેષ્ઠ 15 ફિલ્મોમાં સ્થાન

એકેડમી ઓફ મોશન પિક્ચર આર્ટ્સ એન્ડ સાયન્સીસે 'બેસ્ટ ઇન્ટરનેશનલ ફીચર ફિલ્મ' કેટેગરી માટે વિશ્વભરમાંથી માત્ર 15 ફિલ્મોને શોર્ટલિસ્ટ કરી છે, જેમાં ભારતની 'હોમબાઉન્ડ' મજબૂત દાવેદાર તરીકે ઉભરી આવી છે. હવે તેની સ્પર્ધા આર્જેન્ટિનાની "બેલેન", બ્રાઝિલની "ધ સિક્રેટ એજન્ટ", ફ્રાન્સની "ઇટ વોઝ જસ્ટ એન એક્સિડેન્ટ" અને દક્ષિણ કોરિયાની "નો અધર ચોઇસ" જેવી પ્રભાવશાળી ફિલ્મો સાથે થશે.

ક્યારે થશે ફાઈનલ જાહેરાત?

સિનેમા જગતના ચાહકોની નજર હવે 22 જાન્યુઆરી, 2026 પર ટકેલી છે, જ્યારે ઓસ્કાર માટેના અંતિમ 5 નોમિનેશન જાહેર કરવામાં આવશે. જો 'હોમબાઉન્ડ' આ યાદીમાં સ્થાન મેળવશે, તો તે ભારત માટે ઓસ્કાર જીતવાની દિશામાં મોટું ડગલું હશે. આ ભવ્ય એવોર્ડ સમારોહ 15 માર્ચ, 2026ના રોજ યોજાશે, જેનું હોસ્ટિંગ પ્રખ્યાત કોમેડિયન કોનન ઓ'બ્રાયન કરવાના છે.

જો તમે હજુ સુધી આ ઈમોશનલ રોલરકોસ્ટર ફિલ્મ નથી જોઈ, તો તમે અત્યારે જ નેટફ્લિક્સ (Netflix) પર તેનો આનંદ માણી શકો છો.