નવી દિલ્હી: હોલીવુડના દિગ્ગજ દિગ્દર્શક જેમ્સ કેમેરોનની ફિલ્મ 'અવતાર: ફાયર એન્ડ એશિઝ' અત્યારે વિશ્વભરના બોક્સ ઓફિસ પર ધૂમ મચાવી રહી છે. જોકે, આ ફિલ્મના લોકપ્રિય પાત્રો જેક સલી અને નેયતીરી કરતા પણ વધુ ચર્ચા અત્યારે બોલિવૂડના સુપરસ્ટાર ગોવિંદાની થઈ રહી છે. સોશિયલ મીડિયા પર એક અદભૂત વીડિયો વાયરલ થયો છે, જેમાં ગોવિંદા બ્લુ રંગના 'નાવી' અવતારમાં સજ્જ થઈને પંડોરાની દુનિયામાં એન્ટ્રી લેતો જોવા મળે છે.
વાયરલ થઈ રહેલો આ વીડિયો વાસ્તવમાં આર્ટિફિશિયલ ઇન્ટેલિજન્સ (AI) દ્વારા બનાવવામાં આવ્યો છે. આ ક્લિપમાં ગોવિંદા જેવો જ દેખાતો એક 'અવતાર' પોતાની આગવી શૈલીમાં તેની ફિલ્મ 'હસીના માન જાયેગી' ના પ્રખ્યાત ડાયલોગ "હટા સાવન કી ઘટા, ખા-ખુજા બટ્ટી બુઝા સોજા" બોલતો સંભળાય છે. આ વીડિયો એટલી કુશળતાથી બનાવવામાં આવ્યો છે કે પહેલી નજરે તો કોઈ પણ છેતરાઈ જાય. નેટિઝન્સ આ વીડિયો પર હસી હસીને લોટપોટ થઈ રહ્યા છે અને લખી રહ્યા છે કે, "જેમ્સ કેમેરોને પણ આ જોયું હોત તો ગોવિંદાને ખરેખર ફિલ્મમાં લઈ લીધો હોત!"
આ વીડિયો વાયરલ થવા પાછળ એક મોટું કારણ ગોવિંદાનો વર્ષો જૂનો ઇન્ટરવ્યુ છે. એક ટીવી શો દરમિયાન ગોવિંદાએ દાવો કર્યો હતો કે જેમ્સ કેમેરોને તેને 'અવતાર' ફિલ્મની ઓફર કરી હતી અને તેણે જ આ ફિલ્મનું નામ સૂચવ્યું હતું. જોકે, બોડી પર પેઇન્ટ લગાવીને શૂટિંગ કરવાના ડરથી તેણે ફિલ્મ નકારી કાઢી હતી. તે સમયે લોકોએ ગોવિંદાની ખૂબ મજાક ઉડાવી હતી, પણ હવે અવતાર ૩ માં તેનો આ લુક વાયરલ થતા ચાહકો કહી રહ્યા છે કે, "ગોવિંદાનું સપનું AI એ પૂરું કરી દીધું છે."
એક તરફ સોશિયલ મીડિયા પર ગોવિંદાના મીમ્સ અને વીડિયોની રમઝટ ચાલી રહી છે, ત્યારે બીજી તરફ 'અવતાર: ફાયર એન્ડ એશિઝ' બોક્સ ઓફિસ પર નવા રેકોર્ડ્સ સ્થાપી રહી છે. જંગલ અને પાણી પછી હવે આ ફિલ્મમાં અગ્નિની દુનિયા બતાવવામાં આવી છે. ગોવિંદાનો આ વાયરલ વીડિયો ફિલ્મના પ્રમોશનમાં અજાણતા જ મોટો ભાગ ભજવી રહ્યો છે. આ રમુજી વીડિયોએ સાબિત કરી દીધું છે કે ભલે ગોવિંદા હોલીવુડમાં ન ગયો, પણ તેનું પાત્ર અને તેની લોકપ્રિયતા સાત સમંદર પાર પણ અકબંધ છે