મુંબઈ : બોલિવૂડની 'ગોલ્ડન ગર્લ' કિયારા અડવાણી ફરી એકવાર રૂપેરી પડદે ધૂમ મચાવવા તૈયાર છે. સાઉથના સુપરસ્ટાર યશ સાથેની તેની આગામી ફિલ્મ 'ટોક્સિક: અ ફેરીટેલ ફોર ગ્રોન-અપ્સ' (Toxic: A Fairy Tale for Grown-ups) માંથી કિયારાનો પહેલો લૂક રિલીઝ કરવામાં આવ્યો છે. આ ફિલ્મમાં તે 'નાદિયા' ના રહસ્યમય પાત્રમાં જોવા મળશે. આ લૂક જોયા બાદ ચાહકોમાં ભારે ઉત્તેજના જોવા મળી રહી છે, જ્યારે કિયારાએ આ પાત્રને તેના જીવનનું સૌથી પડકારજનક પાત્ર ગણાવ્યું છે.
શારીરિક અને ભાવનાત્મક રીતે નીચોવી નાખનારી ભૂમિકા
પોતાના ફર્સ્ટ લૂકને મળી રહેલા જબરદસ્ત પ્રતિસાદ બાદ કિયારાએ ઈન્સ્ટાગ્રામ પર એક ભાવુક પોસ્ટ શેર કરી હતી. તેણે લખ્યું, "આ એક એવી ભૂમિકા છે જેણે મારી પાસેથી ઘણું માંગ્યું છે - શારીરિક, માનસિક અને ભાવનાત્મક રીતે. તે મારા માટે માત્ર એક રોલ નથી, પણ એક મોટું પરિવર્તન છે. મહિનાઓની સખત મહેનત બાદ આ લૂક સામે આવ્યો છે અને તેને આટલો પ્રેમ મળતો જોઈને હું શબ્દોમાં આભાર માની શકું તેમ નથી." નોંધનીય છે કે, ૨૦૨૫ ની શરૂઆતમાં પુત્રી સારાયાના જન્મ પછી કિયારાનો આ પહેલો મોટો પ્રોજેક્ટ છે.
બ્લેક ગાઉન અને આંસુ: 'નાદિયા'ની રહસ્યમયી દુનિયા
રિલીઝ થયેલા પોસ્ટરમાં કિયારા બ્લેક ઓફ-શોલ્ડર ગાઉનમાં અત્યંત સુંદર દેખાઈ રહી છે, પરંતુ તેના ગાલ પર વહેતા આંસુ અને તેની આંખોમાં છુપાયેલું રહસ્ય કંઈક અલગ જ વાર્તા કહી રહ્યું છે. નિર્દેશક ગીતુ મોહનદાસે કિયારાના અભિનયની પ્રશંસા કરતા કહ્યું કે, આ ફિલ્મ કિયારાને એક કલાકાર તરીકે ફરીથી વ્યાખ્યાયિત કરશે. કિયારાના પતિ અને અભિનેતા સિદ્ધાર્થ મલ્હોત્રાએ પણ સોશિયલ મીડિયા પર પત્નીને સપોર્ટ કરતા લખ્યું કે, "મને ખબર છે કે આ પાત્ર પાછળ તે કેટલી મહેનત કરી છે, હું આ જોવા માટે ખૂબ જ ઉત્સાહિત છું."
મલ્ટી-સ્ટારર ફિલ્મ અને રિલીઝ ડેટ
'ટોક્સિક' ફિલ્મમાં યશ અને કિયારા ઉપરાંત નયનથારા, તારા સુતારિયા, હુમા કુરેશી અને ટોવિનો થોમસ જેવા દિગ્ગજ કલાકારો જોવા મળશે. આ ફિલ્મ કન્નડ અને અંગ્રેજીમાં શૂટ કરવામાં આવી છે અને તેને હિન્દી સહિત અનેક ભાષાઓમાં ડબ કરવામાં આવશે. ફિલ્મ ૧૯ માર્ચ, ૨૦૨૬ ના રોજ ઇદ અને ગુડી પડવાના તહેવારો દરમિયાન સિનેમાઘરોમાં રિલીઝ થવાની છે.