મુંબઈ  : બોલિવૂડનું હોટ કપલ પ્રતીક બબ્બર અને પ્રિયા બેનર્જી ફરી એકવાર ચર્ચામાં છે. આ વખતે ચર્ચા તેમના લગ્નના ફોટાની નહીં, પરંતુ તેમની ઓન-સ્ક્રીન કેમિસ્ટ્રીની છે. લોકપ્રિય વેબ સિરીઝ "ફોર મોર શોટ્સ પ્લીઝ" ની ચોથી અને અંતિમ સિઝનમાં પ્રિયા બેનર્જીએ તેના પતિ પ્રતીક સાથે એક ખાસ કેમિયો (નાનકડી ભૂમિકા) કર્યો છે. લગ્ન પછી આ જોડી પહેલીવાર કોઈ પ્રોજેક્ટમાં સાથે જોવા મળી છે.
લગ્નના ફોટા જોઈને નિર્માતાઓએ કર્યો સંપર્ક
પ્રિયા બેનર્જીએ જણાવ્યું કે, આ અનુભવ ખરેખર ખૂબ જ ખાસ હતો. પ્રિયાના કહેવા મુજબ, જ્યારે તેમના લગ્નના ફોટા સોશિયલ મીડિયા પર વાયરલ થયા, ત્યારે સિરીઝના નિર્માતાઓએ આ નાનકડી ભૂમિકા માટે તેમનો સંપર્ક કર્યો હતો. પ્રતીક પોતે પણ ઈચ્છતો હતો કે પ્રિયા આ શોનો ભાગ બને, કારણ કે આ સિરીઝ પ્રતીકના દિલની ખૂબ નજીક છે.
પ્રતીક માટે પ્રિયાએ લીધો નિર્ણય
પ્રિયાએ વધુમાં જણાવ્યું કે, તેણે આ રોલ કોઈ વ્યાવસાયિક કારણોસર નહીં, પરંતુ માત્ર પ્રતીક સાથેની પળોને માણી શકાય તે માટે સ્વીકાર્યો હતો. તેણે કહ્યું, "જીવનનો નવો અધ્યાય શરૂ કર્યા પછી તેની સાથે સ્ક્રીન શેર કરવી એ મારા માટે માત્ર મજા હતી." આ સિરીઝ હાલમાં પ્રાઇમ વિડિયો પર રિલીઝ થઈ છે, જેમાં પ્રતીક મુખ્ય ભૂમિકામાં છે અને પ્રિયાની એન્ટ્રી દર્શકો માટે એક સરપ્રાઈઝ જેવી છે.
રેમ્પ વોકથી લઈને લગ્ન સુધીની સફર
આ પહેલીવાર નથી જ્યારે આ કપલ સાથે જોવા મળ્યું હોય. આ વર્ષે ઓક્ટોબરમાં એક ફેશન ઈવેન્ટમાં બંનેએ સાથે રેમ્પ વોક કર્યું હતું, જેની તસવીરો ખૂબ વાયરલ થઈ હતી. ત્યારે પ્રતીકે કહ્યું હતું કે પ્રિયા સાથે કામ કરવાથી તેને જે આત્મવિશ્વાસ મળે છે તે અન્ય કોઈ સાથે મળતો નથી.
વેલેન્ટાઇન ડે પર કર્યા હતા લગ્ન
યાદ અપાવી દઈએ કે, પ્રતીક અને પ્રિયાએ આ વર્ષે ૧૪ ફેબ્રુઆરી, વેલેન્ટાઇન ડેના રોજ ખૂબ જ સાદગીથી પરિવાર અને મિત્રોની હાજરીમાં લગ્ન કર્યા હતા. ત્યારથી જ આ જોડી સોશિયલ મીડિયા પર ફેન્સની ફેવરિટ બની ગઈ છે.