મુંબઈ, તા. 25 : આજે દેશભરમાં નાતાલની ધૂમ છે ત્યારે માયાનગરી મુંબઈ પણ લાલ અને સફેદ રંગના ઉત્સાહમાં ડૂબી ગઈ છે. બોલિવૂડ સેલેબ્સે પોતાના અનોખા અંદાજમાં આ તહેવારની ઉજવણી કરી છે. ખાસ કરીને કાર્તિક આર્યન અને અનન્યા પાંડે માટે આ નાતાલ ડબલ ખુશીઓ લઈને આવી છે, કારણ કે આજે તેમની નવી રોમેન્ટિક કોમેડી ફિલ્મ "તૂ મેરી મેં તેરા, મેં તેરા તૂ મેરી" સિનેમાઘરોમાં રિલીઝ થઈ છે. આ જોડીએ ફિલ્મની સફળતા માટે પ્રાર્થના કરી પ્રશંસકોને નાતાલની વધાઈ આપી હતી.
ચંકી પાંડેએ સોશિયલ મીડિયા પર ફેમિલી સેલિબ્રેશનના ફોટા શેર કર્યા હતા, જેમાં કાર્તિક અને અનન્યા આખા પરિવાર સાથે મસ્તી કરતા જોવા મળ્યા હતા. બીજી તરફ, 'ગરીબોના મસીહા' ગણાતા સોનુ સૂદે કુદરતના સાનિધ્યમાં લાલ હૂડી પહેરીને શાંતિપૂર્ણ રીતે નાતાલની ઉજવણી કરી હતી. સોનુએ મોર અને પ્રાકૃતિક દ્રશ્યોના ફોટા શેર કરીને ફેન્સને મેરી ક્રિસમસ પાઠવ્યું હતું.
કપૂર પરિવારની પરંપરાગત લંચ પાર્ટી
બોલિવૂડમાં નાતાલ હોય અને કપૂર પરિવારની પાર્ટી ન હોય તેવું તો બને જ નહીં! રણબીર કપૂર, કરીના કપૂર ખાન અને આખું કપૂર ખાનદાન દર વર્ષની જેમ પરંપરાગત ક્રિસમસ લંચ માટે એકઠું થયું હતું, જેના ફોટા ઈન્ટરનેટ પર વાયરલ થઈ રહ્યા છે. તે જ સમયે, ઈશા કોપ્પીકરે તેની પુત્રી સાથે ક્રિસમસ ટ્રી સજાવતો એક ક્યૂટ વીડિયો શેર કર્યો હતો, જેમાં સાન્ટાના વેશમાં ભગવાન ગણેશની મૂર્તિએ સૌનું ધ્યાન ખેંચ્યું હતું.
નિમરત કૌર અને ઉર્મિલા માતોંડકરે પણ પોતાના સોશિયલ મીડિયા હેન્ડલ્સ પર ગ્લેમરસ તસવીરો અને વીડિયો પોસ્ટ કરીને ચાહકોના દિલ જીતી લીધા છે. રાધિકા શરતકુમારે ભાવુક થઈને પોતાની માતાને યાદ કરતા પરિવાર અને મિત્રો સાથે ક્રિસમસ સેલિબ્રેટ કર્યું હતું. આમ, મુંબઈથી લઈને જેસલમેર સુધી, બોલિવૂડના તમામ સિતારાઓ અત્યારે તહેવારના હર્ષોલ્લાસમાં મગ્ન છે.