મુંબઈ: બોલીવુડ માટે વર્ષ ૨૦૨૬ બ્લોકબસ્ટર સાબિત થવાના સંકેતો મળી રહ્યા છે. ફિલ્મ ઉદ્યોગના અંદરના સૂત્રો અને સોશિયલ મીડિયા પર થઈ રહેલી જાહેરાતો મુજબ, આવનારું વર્ષ મોટા બજેટ અને મોટા સ્ટાર્સનું વર્ષ રહેશે.
નિર્દેશક આદિત્ય ધરની મલ્ટી-સ્ટારર ફિલ્મ 'ધુરંધર ૨' જાસૂસી અને એક્શન ડ્રામાથી ભરપૂર હશે તેવી ચર્ચાઓ છે.
આ તરફ ભારતીય સિનેમાના ઇતિહાસની સૌથી મહત્વાકાંક્ષી ફિલ્મ ગણાતી નિતેશ તિવારીની 'રામાયણ' પણ ૨૦૨૬માં સિનેમાઘરોમાં આવવા સજ્જ છે, જેમાં રણબીર કપૂર ભગવાન રામના પાત્રમાં જોવા મળશે.
શાહરુખ ખાનના ચાહકો માટે પણ મોટા સમાચાર છે, કારણ કે સુજોય ઘોષ દ્વારા નિર્દેશિત ફિલ્મ 'કિંગ' પણ ૨૦૨૬માં રિલીઝ થવાની તૈયારીમાં છે, જેમાં શાહરુખ ખાન એક અલગ જ અંદાજમાં ડોન જેવા ગ્રે-શેડ પાત્રમાં જોવા મળે તેવી શક્યતા છે.
આ ઉપરાંત સલમાન ખાનની આગામી ફિલ્મ કે જેનું શીર્ષક 'બેટલ ઓફ ગલવાન' હોવાની ચર્ચા છે, તેના પર પણ ઉદ્યોગની નજર છે. કહેવાય છે કે આ ફિલ્મ દેશભક્તિ અને એક્શનનો ડબલ ડોઝ હશે, જે ગલવાન ઘાટીના સંઘર્ષ પર આધારિત હોઈ શકે છે.