મુંબઈ : બોલીવુડ સુપરસ્ટાર રણવીર સિંહની ફિલ્મ 'ધુરંધર' બોક્સ ઓફિસ પર એક એવી સુનામી સાબિત થઈ છે જે રોકાવાનું નામ નથી લઈ રહી. 5 ડિસેમ્બરે રિલીઝ થયેલી આ ફિલ્મે રિલીઝના એક મહિના બાદ પણ થિયેટરોમાં પોતાની મજબૂત પકડ જાળવી રાખી છે. પાકિસ્તાનના લ્યારીમાં ઘૂસતા અંડરકવર એજન્ટ 'હમઝા'ની ભૂમિકામાં રણવીરે પ્રેક્ષકોના દિલ જીતી લીધા છે.
સામાન્ય રીતે ફિલ્મો બે અઠવાડિયામાં ઠંડી પડી જતી હોય છે, પરંતુ 'ધુરંધર' તેના ચોથા અઠવાડિયામાં પણ કરોડોમાં કમાણી કરી રહી છે. ફિલ્મે તેના 30મા દિવસે ₹8.58 કરોડનું શાનદાર કલેક્શન કર્યું છે. આ સાથે ભારતનું કુલ કલેક્શન ₹756.33 કરોડ પર પહોંચી ગયું છે. હવે આ ફિલ્મ ભારતની પ્રથમ એવી બોલીવુડ ફિલ્મ બનવા જઈ રહી છે જે ₹800 કરોડના જાદુઈ આંકડાને સ્પર્શશે.
આદિત્ય ધાર દ્વારા નિર્દેશિત આ ફિલ્મે વર્લ્ડવાઈડ બોક્સ ઓફિસ પર ₹1,200 કરોડથી વધુની કમાણી કરીને ભારતીય સિનેમાના ઈતિહાસમાં પોતાનું નામ સુવર્ણ અક્ષરે અંકિત કરી દીધું છે. ફિલ્મની સફળતા પાછળ તેની મજબૂત સ્ટારકાસ્ટ પણ જવાબદાર છે, જેમાં અક્ષય ખન્ના, સંજય દત્ત, આર. માધવન અને અર્જુન રામપાલ જેવા દિગ્ગજોએ પાવરફુલ પરફોર્મન્સ આપ્યું છે.
'ધુરંધર' એ અત્યાર સુધીમાં 'જવાન', 'એનિમલ' અને 'ગદર 2' જેવી બ્લોકબસ્ટર ફિલ્મોના રેકોર્ડ તોડી નાખ્યા છે. હવે તેની નજર અલ્લુ અર્જુનની 'પુષ્પા 2: ધ રૂલ' ના હિન્દી વર્ઝનના રેકોર્ડ પર છે, જેણે ₹830 કરોડની કમાણી કરી હતી. જો આગામી સપ્તાહના અંતે પણ આવી જ ભીડ જોવા મળી, તો રણવીર સિંહ હિન્દી સિનેમાનો નવો 'સુપર કિંગ' બની જશે. નવા વર્ષની શરૂઆતમાં પણ ફટાકડા જેવી કમાણી કરનારી આ પહેલી હિન્દી ફિલ્મ બની છે, જેણે સતત બે આંકડામાં કમાણી ચાલુ રાખી છે.