મુંબઈ: બોલિવૂડમાં અત્યારે જો કોઈ એક ફિલ્મની ચર્ચા સૌથી વધુ થતી હોય તો તે છે આદિત્ય ધરની બ્લોકબસ્ટર ફિલ્મ 'ધૂરંધર'. આ ફિલ્મે માત્ર એક જ મહિનામાં બોક્સ ઓફિસ પર ૮૦૦ કરોડ રૂપિયાની કમાણી કરીને હિન્દી સિનેમાના તમામ રેકોર્ડ તોડી નાખ્યા છે. આ સફળતાની વચ્ચે ફિલ્મનું રોમેન્ટિક ગીત 'શરારત' પણ યુટ્યુબ પર ઇતિહાસ રચી રહ્યું છે. આ ગીતે ૧૦૦ મિલિયન (૧૦ કરોડ) થી વધુ વ્યુઝ મેળવીને નવો માઈલસ્ટોન સ્થાપિત કર્યો છે.

ગીતની આ ભવ્ય સફળતા બાદ તેમાં મુખ્ય ભૂમિકા ભજવનાર અભિનેત્રી આયશા ખાન અત્યંત ભાવુક થઈ ગઈ હતી. સોશિયલ મીડિયા પર પોતાની લાગણી વ્યક્ત કરતા તેણે ચાહકોનો આભાર માન્યો હતો. આયશાએ ગર્વ સાથે કહ્યું, "આ સફળતાનો શ્રેય મારા ચાહકોને જાય છે. હવે મને કોઈ રોકી શકશે નહીં." ગીતમાં આયશાના અંદાજ અને ડાન્સ મૂવ્સે યુવાઓને ઘેલા કર્યા છે.
 દિગ્દર્શક આદિત્ય ધરે 'ધૂરંધર' દ્વારા ફરી એકવાર સાબિત કરી દીધું છે કે તેઓ દર્શકોની નસ સમજે છે. ફિલ્મની વાર્તાની સાથે સાથે તેનું સંગીત પણ તેની સફળતામાં મહત્વનું પાસું રહ્યું છે. ૧૦૦ મિલિયન વ્યુઝ પાર કરનાર 'શરારત' ગીત દરેક સોશિયલ મીડિયા પ્લેટફોર્મ પર રીલ્સમાં ટ્રેન્ડ કરી રહ્યું છે. સંગીત પ્રેમીઓ આ ગીતને ૨૦૨૬નું સૌથી મોટું ચાર્ટબસ્ટર ગણાવી રહ્યા છે.
 ફિલ્મ વિશ્લેષકોના મતે, 'ધૂરંધર' જે ગતિએ આગળ વધી રહી છે તે જોતા તે ટૂંક સમયમાં ૧૦૦૦ કરોડના ક્લબમાં સામેલ થઈ શકે છે. બોલિવૂડના ઈતિહાસમાં આ પહેલીવાર છે જ્યારે કોઈ ફિલ્મે માત્ર ૩૦ દિવસમાં ૮૦૦ કરોડની કમાણી કરી હોય. ફિલ્મના કલાકારો અને ક્રૂ અત્યારે આ ડબલ સફળતાની ઉજવણીમાં ડૂબેલા છે.