અમદાવાદ: તાજેતરમાં ગુજરાતી ફિલ્મો વૈશ્વિક સ્તરે ડંકો વગાડી રહી છે, ત્યારે 'વશ' (હિન્દીમાં શૈતાન) પછી હવે 'લાલો: કૃષ્ણ સદા સહાયતે' એ બોક્સ ઓફિસ પર ધમાકેદાર પ્રદર્શન કર્યું છે. આ ફિલ્મ માત્ર મનોરંજન નથી, પણ માનવ મન અને શ્રદ્ધાની એવી લડાઈ છે જે સીધી હૃદયને સ્પર્શે છે. અંકિત સખિયાના નિર્દેશનમાં બનેલી આ ફિલ્મ માત્ર ૫૦ લાખના બજેટમાં બની હોવા છતાં ૧૫૦ ગણી કમાણી કરીને ૨૦૨૫-૨૬ની સૌથી સફળ ફિલ્મ સાબિત થઈ છે.
ફિલ્મની વાર્તા એક સામાન્ય રિક્ષાચાલક લાલો (કરણ જોષી) અને તેની પત્ની તુલસી (રીવા રાચ્છ)ની છે. પરિવારના વિરોધ છતાં લગ્ન કરનાર આ કપલ પોતાની નાની દુનિયામાં ખુશ હોય છે, પરંતુ પુત્રી ખુશીના અકસ્માત બાદ લાલો દેવામાં ડૂબી જાય છે. આર્થિક બોજ અને ખરાબ સંગત તેને દારૂના વ્યસન તરફ ધકેલે છે. વાર્તામાં વળાંક ત્યારે આવે છે જ્યારે લોભમાં આવીને લાલો એક ફાર્મહાઉસમાં ચોરી કરવા જાય છે અને ત્યાં પૈસાની સૂટકેસ સાથે કેદ થઈ જાય છે.
: ફિલ્મનું સૌથી મજબૂત પાસું એ છે કે જ્યારે લાલો ભૂખ-તરસથી તરફડતો હોય છે, ત્યારે તેને ભગવાન કૃષ્ણ (શ્રુહદ ગોસ્વામી)નું માર્ગદર્શન મળે છે. આ કોઈ સામાન્ય ફિલોસોફી નથી, પણ એક માણસનું પશુતામાંથી માનવતા તરફનું પરિવર્તન છે. ફિલ્મ એ સમજાવે છે કે જો તમારી પાસે સુખી પરિવાર અને શાંતિ હોય, તો તમે વિશ્વના સૌથી ધનિક વ્યક્તિ છો.
: કરણ જોષીએ એક લાચાર અને ગુસ્સાવાળા રિક્ષાચાલક તરીકે જીવંત અભિનય કર્યો છે, જ્યારે રીવા રાચ્છે એક મજબૂત ગુજરાતી પત્નીના પાત્રમાં પ્રાણ ફૂંક્યા છે. જોકે, ટીકાકારોનું માનવું છે કે હિન્દી ડબિંગમાં સંવાદો થોડા નબળા લાગે છે અને બેકગ્રાઉન્ડ મ્યુઝિકમાં હજુ સુધારો થઈ શક્યો હોત, છતાં વાંસળીના સૂર વાર્તાને ઉંચાઈ પર લઈ જાય છે.
 જો તમે 'કાંતારા' જેવી શ્રદ્ધા અને રોમાંચથી ભરેલી ફિલ્મોના ચાહક હોવ, તો 'લાલો' તમારા માટે શ્રેષ્ઠ પસંદગી છે. આ ફિલ્મ એ સાબિત કરે છે કે મોટા બજેટ કે સુપરસ્ટાર્સ વગર પણ જો વાર્તા સાચી હોય, તો તે દર્શકોના દિલ જીતી શકે છે.