લોસ એન્જલસ: હોલીવુડના સૌથી પ્રતિષ્ઠિત ૯૮મા એકેડેમી એવોર્ડ્સ (ઓસ્કાર ૨૦૨૬) માટેના નામાંકનોની જાહેરાત થઈ ગઈ છે અને આ વખતે ‘સિનર્સ’ (Sinners) ફિલ્મે ૧૬ નોમિનેશન મેળવીને ઓસ્કારના ઈતિહાસના તમામ જૂના રેકોર્ડ તોડી નાખ્યા છે. ૧૯૩૦ના દાયકાની પૃષ્ઠભૂમિ પર આધારિત આ હોરર ફેન્ટાસિયા ફિલ્મે અગાઉના ૧૪ નોમિનેશનના રેકોર્ડને પાછળ છોડી દીધો છે. તેની પાછળ પાછળ ‘વન બેટલ આફ્ટર અધર’ પણ ૧૩ નોમિનેશન સાથે મજબૂત દાવેદાર તરીકે ઉભરી છે.
મોટા બજેટની મૌલિક ફિલ્મોનો વિજય
આ વર્ષના નોમિનેશનમાં એક ખાસ ટ્રેન્ડ જોવા મળ્યો છે. સ્ટુડિયો સામાન્ય રીતે મોટી સિક્વલ ફિલ્મો પર દાવ લગાવતા હોય છે, પરંતુ વોર્નર બ્રધર્સે મૌલિક કન્ટેન્ટ ધરાવતી ફિલ્મો પર જોખમ ખેડ્યું અને તે સફળ સાબિત થયું. રાયન કૂગલરની ‘સિનર્સ’ એ અત્યાર સુધીમાં ૩૬૮ મિલિયન ડોલરની ટિકિટો વેચી છે, જ્યારે પોલ થોમસ એન્ડરસનની ‘વન બેટલ આફ્ટર અધર’ એ વિશ્વભરમાં ૨૦૬ મિલિયન ડોલરની કમાણી કરી છે. બંને ફિલ્મો શ્રેષ્ઠ ચિત્ર, દિગ્દર્શક અને અભિનય જેવી મુખ્ય શ્રેણીઓમાં નામાંકિત થઈ છે.
અભિનયના ક્ષેત્રે દિગ્ગજોનો મુકાબલો
શ્રેષ્ઠ અભિનેતાની શ્રેણીમાં આ વખતે કાંટે કી ટક્કર જોવા મળશે. ‘માર્ટી સુપ્રીમ’ માટે ટીમોથી ચેલામેટ, ‘વન બેટલ આફ્ટર અધર’ માટે લિયોનાર્ડો ડી કેપ્રિયો અને ‘સિનર્સ’ માં બેવડી ભૂમિકા ભજવનાર માઈકલ બી. જોર્ડન વચ્ચે ટ્રોફી માટે મુકાબલો છે. બીજી તરફ, શ્રેષ્ઠ અભિનેત્રી માટે એમ્મા સ્ટોન (બુગોનિયા) અને જેસી બકલી (હેમ્નેટ) મજબૂત દાવેદાર ગણાય છે.
નવી શ્રેણી અને હોસ્ટિંગ
આ વર્ષે ઓસ્કારમાં એક નવો ફેરફાર પણ જોવા મળશે. ૨૦૦૧ પછી પહેલીવાર એક નવી સ્પર્ધાત્મક શ્રેણી ‘બેસ્ટ કાસ્ટિંગ’ ઉમેરવામાં આવી છે. કાર્યક્રમનું સંચાલન ફરી એકવાર કોનન ઓ’બ્રાયન કરશે, જેમના ગયા વર્ષના પર્ફોર્મન્સને દર્શકોએ ખૂબ વખાણ્યું હતું. ઓસ્કાર સમારોહ ૧૫ માર્ચે યોજાશે, જેનું જીવંત પ્રસારણ ABC અને Hulu પર કરવામાં આવશે.
ભારત માટે નિરાશા
જ્યાં વૈશ્વિક સ્તરે ઉત્સાહ છે, ત્યાં ભારત માટે માઠા સમાચાર એ છે કે ભારતની સત્તાવાર એન્ટ્રી ‘હોમબાઉન્ડ’ આ નોમિનેશન લિસ્ટમાં સ્થાન મેળવી શકી નથી. નોર્વેની ‘સેન્ટિમેન્ટલ વેલ્યુ’ અને બ્રાઝિલની ‘ધ સિક્રેટ એજન્ટ’ જેવી ફિલ્મોએ આંતરરાષ્ટ્રીય શ્રેણીમાં બાજી મારી છે.