નવી દિલ્હી : હોલીવુડના પાવર કપલ ડેવિડ બેકહામ અને વિક્ટોરિયા બેકહામના પરિવારમાં ચાલી રહેલા કથિત 'સાસ-બહુ' ડ્રામાએ અત્યારે આખા વિશ્વનું ધ્યાન ખેંચ્યું છે. આ વિદેશી પારિવારિક વિખવાદમાં હવે ભારતીય અભિનેત્રી કંગના રનૌતે ઝંપલાવ્યું છે. કંગનાએ સોશિયલ મીડિયા પર ખુલ્લેઆમ વિક્ટોરિયા બેકહામ (VB) ને પોતાનું સમર્થન જાહેર કરીને તેને 'વાસ્તવિક રાણી' તરીકે સંબોધી છે.
છેલ્લા કેટલાક સમયથી મીડિયામાં અહેવાલો વહેતા થયા છે કે વિક્ટોરિયા બેકહામ અને તેની પુત્રવધૂ વચ્ચે તણાવ ચાલી રહ્યો છે. આ અફવાઓ અને પારિવારિક તણાવ વચ્ચે કંગનાએ ઈન્સ્ટાગ્રામ પર એક પોસ્ટ શેર કરીને આ ડ્રામા પર કટાક્ષ કર્યો હતો. કંગનાએ હસતા હસતા લખ્યું કે, "કોઈ પણ સાસ-બહુ નાટક મને વિક્ટોરિયા બેકહામથી નફરત કરવા માટે મજબૂર નહીં કરી શકે. તે એક સાચી ક્વીન છે."
કંગનાની આ ટિપ્પણી બાદ સોશિયલ મીડિયા પર ચાહકોમાં ચર્ચા જાગી છે. કેટલાક લોકો કંગનાના આ બેબાક અંદાજને પસંદ કરી રહ્યા છે, તો કેટલાક તેને આંતરરાષ્ટ્રીય સ્તરે ચાલી રહેલા પારિવારિક મામલામાં માથું ન મારવાની સલાહ આપી રહ્યા છે. ઉલ્લેખનીય છે કે, કંગના રનૌત હંમેશા પોતાના રોકટોક વગરના નિવેદનો માટે જાણીતી છે અને આ વખતે તેણે ફેબ્યુલસ વિક્ટોરિયા બેકહામ પ્રત્યેની પોતાની દિવાનગી વ્યક્ત કરીને સૌને ચોંકાવી દીધા છે.
બેકહામ પરિવારમાં ચાલી રહેલો આ ગરમાવો ક્યારે શાંત પડશે તે તો સમય જ કહેશે, પરંતુ હાલમાં તો કંગનાના આ સ્ટેન્ડને કારણે ભારતીય ફેન્સમાં પણ આ હોલીવુડ ડ્રામા ચર્ચાનું કેન્દ્ર બન્યો છે.