મુંબઈ:  બોલિવૂડના શહેનશાહ અમિતાભ બચ્ચન માત્ર ફિલ્મી પડદે જ નહીં, પરંતુ સોશિયલ મીડિયાની દુનિયામાં પણ 'કિંગ' સાબિત થયા છે. હાલમાં જ તેમણે ફેસબુક અને ઇન્સ્ટાગ્રામ પર કરેલી કેટલીક રહસ્યમય પોસ્ટ્સને કારણે ચાહકોમાં ચર્ચાનો દોર શરૂ થયો છે. ૮૩ વર્ષની વયે પણ નવી પેઢી સાથે કદમ મિલાવતા બિગ બીએ ઇન્સ્ટાગ્રામ પર માત્ર એટલું જ લખ્યું, "તેમાં કંઈક તો છે." આ ટૂંકા વાક્યે લાખો ફોલોઅર્સને મૂંઝવણમાં મૂકી દીધા છે. લોકો કોમેન્ટ સેક્શનમાં પૂછી રહ્યા છે કે અમિતાભ જી આખરે કોના તરફ ઈશારો કરી રહ્યા છે? શું આ કોઈ નવી ફિલ્મનું પ્રમોશન છે કે પછી જીવનનો કોઈ ઊંડો ફિલોસોફિકલ સંદેશ, તે જાણવા માટે ઇન્ટરનેટ પર હોબાળો મચી ગયો છે.

અમિતાભે પોતાની ફેસબુક પોસ્ટમાં જીવનના પાઠ વિશે વાત કરતા લખ્યું, "દરરોજ એક નવો પાઠ મળે છે, આજે પણ અમે કંઈક શીખ્યા." તેમની આ સાદગી અને સતત શીખવાની વૃત્તિને ચાહકોએ વધાવી લીધી છે. એક યુઝરે લખ્યું કે, "આ ઉંમરે પણ તમારી આ જિજ્ઞાસા જ તમને સામાન્યમાંથી અસાધારણ બનાવે છે." જોકે, દરેક વખતે પ્રશંસા જ મળે તેવું નથી; કેટલાક યુઝર્સે રમુજી અંદાજમાં પૂછ્યું કે, "સાહેબ, જો તમે જ અંત સુધી શીખતા રહેશો, તો અમને ક્યારે શીખવશો?" આવી મિશ્ર પ્રતિક્રિયાઓ વચ્ચે અમિતાભની પોસ્ટ્સ વાયરલ થઈ રહી છે, જે સાબિત કરે છે કે બચ્ચન પરિવારના વડા આજે પણ ડિજિટલ સ્પેસમાં સૌથી વધુ પ્રભાવશાળી વ્યક્તિત્વ છે.

રસપ્રદ વાત એ છે કે અમિતાભ ઘણીવાર પોતાની પોસ્ટમાં સંદર્ભ આપતા નથી, જે તેમના ચાહકો માટે એક કોયડો બની રહે છે. "તેમાં કંઈક તો છે" વાળી પોસ્ટ પર એક યુઝરે તો સીધો જ સવાલ કર્યો, "સર, તમે આવા ટ્વીટ કેમ કરો છો? અમને થોડું તો સમજાવો કે આ કયા બાબતે છે!" ટ્રોલર્સ હોય કે ચાહકો, અમિતાભની દરેક હિલચાલ પર સૌની નજર હોય છે. લોકો માને છે કે તેમની ટૂંકી વાતોમાં પણ જીવનનું કોઈ મોટું રહસ્ય છુપાયેલું હોય છે. હાલ તો બિગ બીની આ પોસ્ટ્સ પર મીમ્સ અને ચર્ચાઓનો પૂર આવ્યો છે, અને ચાહકો રાહ જોઈ રહ્યા છે કે ક્યારે 'બચ્ચન સાહેબ' આ રહસ્ય પરથી પડદો ઉઠાવશે.