મુંબઈ : ડિજિટલ દુનિયામાં અત્યારે ક્રાઈમ અને રિવેન્જ ડ્રામાનો ક્રેઝ વધી રહ્યો છે, ત્યારે વધુ એક રોમાંચક વેબ સિરીઝ ‘અબ હોગા હિસાબ’ (Ab Hoga Hisaab) નું ટીઝર રિલીઝ કરવામાં આવ્યું છે. આ સિરીઝમાં બોલિવૂડ ગ્લેમર મૌની રોય, ટીવીનો લોકપ્રિય અભિનેતા શાહીર શેખ, અનુભવી એક્ટર સંજય કપૂર અને નિમ્રિત કૌર આહલુવાલિયા મુખ્ય ભૂમિકામાં જોવા મળશે. આ સિરીઝ એમેઝોન MX પ્લેયર પર રિલીઝ થવાની છે, જે પ્રેક્ષકોને શક્તિ અને લોભથી ભરેલી દુનિયાની સફર કરાવશે.
વાર્તાના કેન્દ્રમાં બે ભાઈઓ, બોબી (શાહીર શેખ) અને બંટી મનોચા છે, જેમનું શાંત જીવન એક નાટકીય વળાંક લે છે અને તેઓ અચાનક ખતરનાક ગુનાખોરીની દુનિયામાં ખેંચાઈ જાય છે. મંગળવારે લોન્ચ થયેલા ટીઝરમાં સંજય કપૂરને ‘ગોલ્ડી સેખોન’ તરીકે રજૂ કરવામાં આવ્યા છે, જે એક ક્રૂર અને શક્તિશાળી વિરોધીની ભૂમિકામાં છે. બીજી તરફ, મૌની રોય ‘કામના’ ના પાત્રમાં એક તીક્ષ્ણ અને ગણતરીબાજ મહિલા તરીકે જોવા મળશે, જે સત્તાના ખેલમાં પોતાની અલગ ઓળખ ધરાવે છે.
કલાકારોએ શેર કર્યો અનુભવ
પોતાના પાત્ર વિશે વાત કરતા શાહીર શેખે જણાવ્યું કે, આ સિરીઝ લાગણીઓ અને તીવ્રતાથી ભરેલી છે અને આટલા ઊંડાણપૂર્વક લખાયેલી વાર્તાનો ભાગ બનવું તે એક અદભૂત અનુભવ છે. સંજય કપૂરે સિરીઝની વાસ્તવિકતા અને માનવ લાગણીઓના દબાણને વખાણ્યું હતું. તો મૌની રોયે પણ ઉમેર્યું કે પાત્રની વિગતો અને વાર્તાનો મૂડ તેને ભજવવા માટે રોમાંચક અને પડકારજનક રહ્યો હતો.
‘અબ હોગા હિસાબ’માં સત્તાની સાચી કિંમત અને અસ્તિત્વ ટકાવી રાખવા માટે થતા સંઘર્ષને ખૂબ જ સુંદર રીતે વણી લેવામાં આવ્યો છે. આ હાઇ-વોલ્ટેજ ડ્રામા ટૂંક સમયમાં જ ઓટીટી પર દસ્તક આપશે, જેના માટે ચાહકોમાં અત્યારથી જ ભારે ઉત્તેજના જોવા મળી રહી છે.