મુંબઈ, તા. 28 : બોલિવૂડની યુવા અભિનેત્રી અનન્યા પાંડે હંમેશા પોતાની સ્ટાઈલ અને સોશિયલ મીડિયા પોસ્ટને કારણે ચર્ચામાં રહે છે. તાજેતરમાં તેણે પોતાની વેનિટી વાનમાંથી એક મિરર સેલ્ફી શેર કરી છે, જેણે ઈન્ટરનેટ પર ધૂમ મચાવી છે. આ ફોટો માત્ર અનન્યાની સુંદરતાને કારણે જ નહીં, પરંતુ તેના અરીસા પર લાગેલા બોલિવૂડ દિગ્ગજોના પોસ્ટર્સને કારણે વાયરલ થઈ રહ્યો છે.
સલમાન-કરિશ્માના ફેન છે અનન્યા?
અનન્યાએ શેર કરેલા ફોટામાં તેના વેનિટી મિરર પર સલમાન ખાન અને કરિશ્મા કપૂરના આઈકોનિક કટ-આઉટ અને ફોટા જોવા મળ્યા હતા. 90ના દાયકાના બાળકોની જેમ અનન્યાએ પણ પોતાનો અરીસો બોલિવૂડના આ સુપરસ્ટાર્સથી શણગાર્યો છે. આ ઉપરાંત, અરીસા પર કરીના કપૂરનો ફેમસ ડાયલોગ "મૈં અપની ફેવરિટ હૂં" નું સ્ટીકર પણ જોવા મળ્યું હતું, જે દર્શાવે છે કે અનન્યા અંદરથી કેટલી ફિલ્મી છે.
ઈજા અને 'નજર'નો ડર
સેલ્ફીમાં અનન્યા ગ્રે કલરની ઓવરસાઈઝ હૂડીમાં જોવા મળી રહી છે, પરંતુ ચાહકોનું ધ્યાન તેના હાથ પર ગયું જે સ્લિંગમાં (પાટામાં) બંધાયેલો હતો. અનન્યા હાલમાં કોઈ ઈજામાંથી રિકવર થઈ રહી છે. તેણે ફોટો પર રમુજી અંદાજમાં એક સ્ટીકર પણ લગાવ્યું છે, જેના પર લખ્યું છે– "નજર લગ ગઈ 2026 મેં ભી." એટલે કે નવા વર્ષની શરૂઆતમાં જ તેને ઈજા થતાં તે થોડી નિરાશ જણાય છે.
વર્ક ફ્રન્ટ અને સફળતા
અનન્યા છેલ્લે કાર્તિક આર્યન સાથે ફિલ્મ "તુ મેરી મેં તેરા" માં જોવા મળી હતી. જોકે તેની OTT ફિલ્મ "CTRL" માં તેના અભિનયના ખૂબ વખાણ થયા હતા. "સ્ટુડન્ટ ઓફ ધ યર 2" થી કરિયરની શરૂઆત કરનાર અનન્યા આજે બોલિવૂડની સૌથી લોકપ્રિય અભિનેત્રીઓમાંથી એક છે.