મુંબઈ : ભારતીય ફિલ્મ ઈન્ડસ્ટ્રીમાં વર્ષોથી એવું મનાતું હતું કે મોટી કમાણી માત્ર સુપરસ્ટાર અભિનેતાઓ જ કરી શકે છે. પરંતુ તાજેતરના આંકડાઓએ આ માન્યતાને જડમૂળથી ઉખેડી નાખી છે. મહિલા પાત્રોની આસપાસ ફરતી ફિલ્મોએ માત્ર ભારતમાં જ નહીં પણ વિદેશી બજારોમાં પણ અબજો રૂપિયાની કમાણી કરી છે. ચાલો જાણીએ દુનિયાભરમાં સૌથી વધુ કમાણી કરનારી ટોચની 10 મહિલા-કેન્દ્રિત ફિલ્મો વિશે.

નંબર 1 અને 2 પર આમિર ખાનની 'દીકરીઓ'નો જાદુ

આ યાદીમાં પ્રથમ ક્રમે 'દંગલ' છે, જેણે વિશ્વભરમાં ₹2070 કરોડની ઐતિહાસિક કમાણી કરી છે. ફોગાટ બહેનોના સંઘર્ષની આ વાર્તાએ ખાસ કરીને ચીનમાં ધૂમ મચાવી હતી. બીજા નંબરે 'સિક્રેટ સુપરસ્ટાર' છે, જેણે ₹912.75 કરોડની કમાણી કરી એક નાની છોકરીના સપનાની તાકાત દુનિયાને બતાવી.

શ્રદ્ધા કપૂર અને આલિયા ભટ્ટનો જલવો

તાજેતરમાં રિલીઝ થયેલી શ્રદ્ધા કપૂરની 'સ્ત્રી 2' આ યાદીમાં ત્રીજા સ્થાને છે, જેણે ₹857 કરોડનું કલેક્શન કર્યું છે. જ્યારે આલિયા ભટ્ટની 'ગંગુબાઈ કાઠિયાવાડી' (₹211.5 કરોડ) અને 'રાઝી' (₹195 કરોડ) એ સાબિત કરી દીધું કે આલિયા વર્તમાન સમયની સૌથી મોટી મહિલા સ્ટાર છે. આ ઉપરાંત મલયાલમ સુપરહીરો ફિલ્મ 'લોકા: પ્રકરણ 1' પણ ₹303 કરોડ સાથે ચોથા ક્રમે રહીને સૌને ચોંકાવી દીધા છે.

કંગનાની 'ક્વીન' થી 'કેરળ સ્ટોરી' સુધી

વિવાદોમાં રહેલી 'ધ કેરળ સ્ટોરી' એ પણ ₹302 કરોડની કમાણી કરીને યાદીમાં પાંચમું સ્થાન મેળવ્યું છે. કંગના રનૌતની 'તનુ વેડ્સ મનુ રિટર્ન્સ' (₹258 કરોડ) અને તેની આઈકોનિક ફિલ્મ 'ક્વીન' (₹93 કરોડ) પણ ટોપ-10 માં સામેલ છે. હોરર-કોમેડી ફિલ્મ 'સ્ત્રી' ના પહેલા ભાગે પણ ₹182 કરોડની કમાણી કરી હતી. આ આંકડાઓ સ્પષ્ટ કરે છે કે પ્રેક્ષકો હવે સારા કન્ટેન્ટ અને મજબૂત મહિલા પાત્રોને વધાવી રહ્યા છે.